കോതമംഗലം: വി.ഡി സതീശന് മുഖ്യമന്ത്രിയായ സര്ക്കാരിന്റെ കീഴില് പ്രഖ്യാപിച്ച വികസന പദ്ധതികളുടെ ഭാഗമായി, പത്തുവര്ഷമായി മുടങ്ങിക്കിടക്കുന്ന ചേലാട് ഇന്റര്നാഷ്ണല്
സ്റ്റേഡിയം പദ്ധതി യാഥാര്ത്ഥ്യമാക്കുന്നതിനുള്ള നടപടികള് വേഗത്തിലാക്കാന് ഷിബു തെക്കുംപുറം എംഎല്എ സ്റ്റേഡിയം സ്ഥലം സന്ദര്ശിച്ചു. പദ്ധതിയുമായി ബന്ധപ്പെട്ട സാങ്കേതികവും ഭരണപരവുമായ കാര്യങ്ങള് ബന്ധപ്പെട്ട ഉദ്യോഗസ്ഥരുമായി എംഎല്എ ചര്ച്ച ചെയ്യുകയും, നിര്മാണ പ്രവര്ത്തനങ്ങള് എത്രയും വേഗം ആരംഭിക്കുന്നതിനാവശ്യമായ തുടര്നടപടികള് സ്വീകരിക്കുമെന്ന് അറിയിക്കുകയും ചെയ്തു.
തുടര്ന്ന് എംഎല്എ ചേലാട് ഗവ. പോളിടെക്നിക് കോളേജ് സന്ദര്ശിച്ചു. വെറും ഒന്നര വര്ഷം മാത്രം പഴക്കമുള്ള കോളേജ് കെട്ടിടത്തിലെ ക്ലാസ് മുറികള് ചോര്ന്നൊലിക്കുന്നതടക്കമുള്ള ഗുരുതരമായ നിര്മ്മാണ പോരായ്മകള് പ്രിന്സിപ്പലും അധ്യാപകരും വിദ്യാര്ത്ഥികളും എംഎല്എയെ നേരില് കാണിച്ച് ബോധ്യപ്പെടുത്തി. വിദ്യാര്ത്ഥികള്ക്ക് സുരക്ഷിതവും മെച്ചപ്പെട്ടതുമായ പഠനാന്തരീക്ഷം ഉറപ്പാക്കാന് അടിയന്തര നടപടികള് സ്വീകരിക്കുമെന്ന് എംഎല്എ അറിയിച്ചു.
കോളേജിലെ വിവിധ വകുപ്പുകളും ലബോറട്ടറികളും സന്ദര്ശിച്ച എംഎല്എ, അടിസ്ഥാന പഠനസൗകര്യങ്ങളിലെ അപര്യാപ്തതയും വിലയിരുത്തി. കമ്പ്യൂട്ടര് സൗകര്യങ്ങളുടെ കുറവ് വിദ്യാര്ത്ഥികളുടെ പഠനത്തെയും പ്രായോഗിക പരിശീലനത്തെയും പ്രതികൂലമായി ബാധിക്കുന്നതിന് പ്രതിവിധിയായി ആസ്തി വികസന ഫണ്ടിലൂടെ ആവശ്യമായ കമ്പ്യൂട്ടറുകളും അനുബന്ധ ഉപകരണങ്ങളും ലഭ്യമാക്കുമെന്നും എംഎല്എ പറഞ്ഞു. പിണ്ടിമന പഞ്ചായത്ത് പ്രസിഡന്റ് കെ.പി. ജോര്ജുകുട്ടി, വൈസ് പ്രസിഡന്റ് ലതാ ഷാജി, വിദ്യാഭ്യാസ-ആരോഗ്യ സ്റ്റാന്ഡിംഗ് കമ്മിറ്റി ചെയര്പേഴ്സണ് സിബി ജെയിംസ്, മറ്റ് ജനപ്രതിനിധികള്, ബന്ധപ്പെട്ട ഉദ്യോഗസ്ഥര് എന്നിവര് സന്ദര്ശനത്തില് പങ്കെടുത്തു.
