കോട്ടപ്പടി പോലീസ് സ്റ്റേഷനിൽ വസന്തം തീർത്ത് ചെണ്ടുമല്ലിപ്പൂക്കൾ

കോതമംഗലം:  കോട്ടപ്പടി പോലീസ് സ്റ്റേഷനിൽ വസന്തം തീർത്ത് ചെണ്ടുമല്ലിപ്പൂക്കൾ വിടർന്നു. ഓറഞ്ച് നിറത്തിലുള്ള നൂറോളം ചെടികളാലാണ് പൂവിടർന്നത്. കൃഷിഭവനിൽ നിന്നും സൗജന്യമായാണ് ചെണ്ടുമല്ലി തൈ ലഭിച്ചത്. ജോലി കഴിഞ്ഞ് വീട്ടിലേക്ക് മടങ്ങുന്ന സമയത്തിലൊരുഭാഗം ചെടികളുടെ പരിപാലനത്തിന് മാറ്റിവച്ചു. തടം കോരി, തൈ നട്ട്, വെള്ളവും വളവും നൽകി പരിപാലിച്ചപ്പോൾ പൂവിട്ടത് നൂറുമേനി. ഈ പൂവ് കൊണ്ട് ഓണത്തിന് സ്റ്റേഷൻ മുറ്റത്ത് പൂക്കളമൊരുക്കാനുളള തയ്യാറെടുപ്പിലാണ് പോലീസുദ്യോഗസ്ഥർ.