പെരുമ്പാവൂർ : സർക്കാർ പുറമ്പോക്കിലെ വെള്ളച്ചാട്ടം ഉൾപ്പെടുന്ന പ്രദേശത്തെ വിനോദ സഞ്ചാര കേന്ദ്രമാക്കുന്നതിനു മുന്നോടിയായി എൽദോസ് കുന്നപ്പിള്ളി എംഎൽഎയുടെ പ്രത്യേക വികസന ഫണ്ടിൽ നിന്നും 35 ലക്ഷം രൂപ വിനിയോഗിച്ചുള്ള റോഡ് നിർമ്മാണ പ്രവർത്തിക്ക് തുടക്കമായി. ഇലക്ഷൻ സമയത്ത് നൽകിയ വാക്ക് പാലിക്കാൻ സാധിച്ചതായി എംഎൽഎ അറിയിച്ചു.എറണാകുളം രായമംഗലം പഞ്ചായത്തിലെ പറമ്പിപ്പീടികയ്ക്ക് സമീപമാണ് സന്ദര്‍ശരെ ആകര്‍ഷിക്കുന്ന മണിപ്പാറ വെള്ളച്ചാട്ടം സ്ഥിതി ചെയ്യുന്നത്. ത്രിവേണി, 606 ഭാഗത്തെ മലമുകളില്‍ നിന്ന് ഉത്ഭവിക്കുന്ന നീരൊഴുക്കാണ് മഴക്കാലത്ത് ചെറിയ വെള്ളച്ചാട്ടമായി മാറുന്നത്.
പാറക്കൂട്ടങ്ങളില്‍ തട്ടി താഴേക്കൊഴുകുന്ന ജലവും, ചുണ്ടൻവള്ളത്തിന്റെ ആകൃതിയിലുള്ള പാറയിൽ കല്ലുകൊണ്ടടിച്ചാൽ മണിനാദം കേൾക്കാൻ സാധിക്കും. എം സ് റോഡില്‍ കീഴില്ലം സെന്റ് തോമസ് സ്‌കൂള്‍ ജംഗ്ഷനില്‍ നിന്ന് രണ്ടു കിലോമീറ്റര്‍ ദൂരെ പറമ്പിപ്പീടികയ്ക്കും ത്രിവേണിയ്ക്കും ഇടയ്ക്കാണ് മണിപ്പാറ.
മഴക്കാലത്ത് വലിയ വഴുക്കല്‍ പ്രദേശമായതിനാല്‍ വെള്ളച്ചാട്ടം കാണാന്‍ എത്തുന്നവര്‍ അതീവ ജാഗ്രത പാലിക്കേണ്ട സ്ഥലം കൂടിയാണ് മണിപ്പാറ. വെളളച്ചാട്ടത്തിനു മധ്യത്തിലാണു മണിപ്പാറ. കാടുകയറിക്കിടക്കുന്നതിനാൽ ഇവിടെയെത്താൻ ബുദ്ധിമുട്ടാണ്. റോഡ് നിർമ്മാണം പൂർത്തിയാകുന്നതോടുകൂടി സഞ്ചാരികളെ കൂടുതൽ ആകർഷിക്കാൻ സാധിക്കുമെന്ന് എംഎൽഎ പറഞ്ഞു.
എൽദോസ് കുന്നപ്പിള്ളി എംഎൽഎ ഉദ്ഘാടനം നിർവഹിച്ച യോഗം രായമംഗലം ഗ്രാമപഞ്ചായത്ത് പ്രസിഡന്റ് എൻ പി അജയകുമാർ അധ്യക്ഷത വഹിച്ചു. യോഗത്തിൽ കൂവപ്പടി ബ്ലോക്ക് പഞ്ചായത്ത് പ്രസിഡന്റ് എ ടി അജിത് കുമാർ, വൈസ് പ്രസിഡന്റ് അംബിക മുരളീധരൻ, ജില്ലാ മെമ്പർ ഷൈമി വർഗീസ്, ബ്ലോക്ക് മെമ്പർ ബീന ഗോപിനാഥ്, വാർഡ് മെമ്പർമാരായ അഞ്ജലി എ ആർ, ജോയി പതിക്കൽ, ടിൻസി ബാബു, കോൺഗ്രസ് മണ്ഡലം പ്രസിഡന്റ് പി പി എൽദോസ്, പൊതു പ്രവർത്തകരായ കെ വി ജയ്സൺ, എ മാധവൻ, റെജി എ കെ, ഷൈജു പി കെ, മണി സി വി, സിസ്‌ലി പോൾ, മാറിയകുട്ടി ബേബി, മുൻ മെമ്പർമാരായ ഇ വി ജോർജ്, ഷാജി, 606 അംഗൻവാടി ടീച്ചർ മായ ടി വി തുടങ്ങിയവർ പങ്കെടുത്തു.
