കോതമംഗലം : കോതമംഗലം താലൂക്ക് ആശുപത്രിയിൽ ചികിത്സയ്ക്ക് എത്തുന്ന രോഗികൾക്ക് ബില്ലിംഗ് കൗണ്ടറിൽ ഓൺലൈൻ പണമിടപാട് സൗകര്യങ്ങൾ നിലവിൽ ലഭ്യമല്ലാത്ത സാഹചര്യമാണ് ഉള്ളത്. കഴിഞ്ഞ സെപ്റ്റംബർ മാസം വരെ ഈ സൗകര്യങ്ങൾ ഉണ്ടായിരുന്നു എങ്കിലും സങ്കേതിക തടസ്സങ്ങൾ ഉന്നയിച്ച് താത്കാലികമായി നിർത്തി വെച്ചതിന് ശേഷം ഇതുവരെ പുനരാരംഭിച്ചട്ടില്ല. കയ്യിൽ ചെറിയ തുകയുമായി രാവിലെ തന്നെ ചീട്ട് എടുക്കുന്നതിനും മറ്റുമായി എത്തുന്ന നിരവധി രോഗികൾക്ക് ഇത് ഒട്ടേറെ ബുദ്ധിമുട്ടുകൾ സൃഷ്ടിക്കുന്നുണ്ട്. അടുത്ത് ATM സൗകര്യങ്ങൾ ഇല്ലാത്തത് ഈ പ്രതിസന്ധിയുടെ ആഘാതം വർദ്ധിപ്പിക്കുന്നു. പലപ്പോഴും അവിചാരിതമായിട്ടാണ് ഡോക്ടർമാർ രോഗികളോട് രോഗ നിർണയത്തിന് വേണ്ട പല പരിശോധനകൾ നടത്താൻ നിർദ്ദേശിക്കുക എന്നാൽ പലരും തന്നെ അതിന് ആവശ്യമായ തുക കയ്യിൽ കരുതിയായിരിക്കില്ല എത്തുന്നത്.
കേന്ദ്ര സംസ്ഥാന സർക്കാരുകൾ ഡിജിറ്റൽ രംഗത്തുള്ള എല്ലാ സേവനങ്ങളും പ്രത്യേകിച്ച് പണമിടപാടുകൾ വളരെ പ്രോത്സാഹിപ്പിക്കുന്ന ഈ കാലഘട്ടത്തിൽ ഓൺലൈൻ സൗകര്യങ്ങളായ യു.പി.ഐ, ക്യൂ.ആർ സ്കാൻ പേയ്മെൻ്റ്, കാർഡ് സ്വൈപിങ് തുടങ്ങിയവ ബില്ലിംഗ് കൗണ്ടറിൽ ലഭ്യമാക്കി രോഗികൾ നേരിടുന്ന ഈ പ്രതിസന്ധി പരിഹരിക്കണം എന്ന് കേരള വിദ്യാർത്ഥി കോൺഗ്രസ്സ് (എം) എറണാകുളം ജില്ല പ്രസിഡൻ്റ് ബിനിൽ വാവേലി ആവശ്യപ്പെട്ടു.
