കോതമംഗലം : മാര്‍ അത്തനേഷ്യസ് (ഓട്ടോണോമസ് ) കോളേജില്‍ കോമേഴ്സ് അസോസിയേഷന്റെ ഉത്ഘാടനം നടന്നു. കോലഞ്ചേരി, കടയിരുപ്പ് സിന്തൈറ്റ് ഇന്‍ഡസ്ട്രീസ് പ്രൈവറ്റ് ലിമിറ്റഡ് മാനേജിങ് ഡയറക്ടര്‍ ഡോ. വിജു ജേക്കബ് ഉദ്ഘാടനം നിര്‍വഹിച്ചു.പ്രിന്‍സിപ്പല്‍ ഡോ. മഞ്ജു കുര്യന്‍ അധ്യക്ഷത വഹിച്ചു.വകുപ്പ് മേധാവി ഡോ ഡയാന ആന്‍ ഐസക്, കോമേഴ്സ് വിഭാഗം മുന്‍ അദ്ധ്യാപകന്‍ പ്രൊഫ. വി. ജെ. പൗലോസ്, ഡോ. രമ്യ. സി. എം എന്നിവര്‍ പ്രസംഗിച്ചു.വളരെ ചെറിയ തോതില്‍ നിന്നും വളര്‍ന്നുവന്ന സിന്ധൈറ്റ് ഗ്രൂപ്പിന്റെ വിജയഗാഥ അമരക്കാരനില്‍ നിന്ന് നേരിട്ട് കേള്‍ക്കാന്‍ സാധിച്ചത് വിദ്യാര്‍ത്ഥികള്‍ക്ക് ഒരു പുതിയ അനുഭവമായിരുന്നു. ദൈവാനുഗ്രഹവും, സൂക്ഷ്മമായ നിരീക്ഷണവും കൃത്യമായ രൂപരേഖയും ഉണ്ടെങ്കില്‍ വിജയം കൈവരിക്കാന്‍ സാധിക്കുമെന്ന് വിജു ജേക്കബ് പറഞ്ഞു .ഉദ്ഘാടനത്തിന് ശേഷം അധ്യാപകരും വിദ്യാര്‍ത്ഥികളുമായി അദ്ദേഹം തുറന്ന സംഭാഷണവും നടത്തുകയുണ്ടായി.അടുത്തകാലത്ത് നമ്മുടെ നാട്ടില്‍ നിന്നും സംഭവിക്കുന്ന കൂട്ടമായ പലായനത്തെക്കുറിച്ച് വിദ്യാര്‍ത്ഥികള്‍ അഭിപ്രായം ചോദിച്ചപ്പോള്‍, നിര്‍ഭാഗ്യകരമായ ഈ അവസ്ഥയ്ക്ക് ഉത്തരവാദിത്വം നമ്മുടെ മനോഭാവം തന്നെയാണ് എന്നാണ് ഡോ. വിജു അഭിപ്രായപ്പെട്ടത്.
