കോതമംഗലം :കോതമംഗലം എം. എ. കോളേജ് നീന്തല്‍ കുളത്തില്‍ നടന്ന 40- മത് മഹാത്മാ ഗാന്ധി സര്‍വകലാശാല പുരുഷ – വനിതാ നീന്തല്‍ മത്സരങ്ങള്‍ സമാപിച്ചപ്പോള്‍ ആതിഥേയരായ കോതമംഗലം മാര്‍ അത്തനേഷ്യസ് കോളേജ് ഇരു വിഭാഗത്തിലും, വാട്ടര്‍ പോളോയിലും ചാമ്പ്യന്‍മാരായി. തുടര്‍ച്ചയായ ആറാം തവണയാണ് കോതമംഗലം എം. എ. കോളേജ് ബി വേണുഗോപാല്‍ എന്നാ നീന്തല്‍ പരിശീലകന്റെ മികവില്‍ മൂന്ന് വിഭാഗങ്ങളിലും വിജയ കീരിടം ചൂടുന്നത്. കേരള സ്റ്റേറ്റ് സ്‌പോര്‍ട്‌സ് കൗണ്‍സിലിന്റെ നീന്തല്‍ പരിശീലകനാണ് പാലാ സ്വദേശിയായ വേണുഗോപാല്‍.പുരുഷ വിഭാഗത്തില്‍ 174 പോയിന്റും, വനിത വിഭാഗത്തില്‍ 172 പോയിന്റും നേടിയാണ് എം. എ. യുടെ ഈ വിജയ കുതിപ്പ്. പുരുഷ വിഭാഗത്തില്‍ രണ്ടാം സ്ഥാനം പാലാ സെന്റ്. തോമസ് കോളേജും(32 പോയിന്റ് )മൂന്നാം സ്ഥാനം മൂലമറ്റം സെന്റ്. ജോസഫ് അക്കാദമിയും (15 പോയിന്റ് )കരസ്ഥമാക്കി. വനിത വിഭാഗത്തില്‍ രണ്ടാം സ്ഥാനം അല്‍ഫോസാ കോളേജ് പാലാ (28 പോയിന്റ് ) യും, മൂന്നാം സ്ഥാനം അസംപ്ഷന്‍ കോളേജ് ചങ്ങനാശ്ശേരി (1 പോയിന്റ് ),കരസ്ഥമാക്കി.വാട്ടര്‍ പോളോയില്‍ എം. എ. കോളേജ് ഒന്നാമതും, സെന്റ്. ജോസഫ് അക്കാദമി മൂലമറ്റം രണ്ടാമതും,സെന്റ് തോമസ് കോളേജ് പാലാ മൂന്നാമതും എത്തി.മത്സരത്തില്‍ പങ്കെടുത്ത നീന്തല്‍ താരങ്ങളെയും,തുടര്‍ച്ചയായി ആറാം തവണയും വിജയം കൈവരിച്ച എം. എ. യുടെ താരങ്ങളെയും, പരിശീലകന്‍ ബി വേണു ഗോപാലിനെയും എം. എ. കോളേജ് അസോസിയേഷന്‍ സെക്രട്ടറി ഡോ. വിന്നി വര്ഗീസ്, എം. ജി. യൂണിവേഴ്‌സിറ്റി കായിക വകുപ്പ് ഡയറക്ടര്‍ ഡോ. ബിനു ജോര്‍ജ് വര്ഗീസ്, കോളേജ് പ്രിന്‍സിപ്പല്‍ ഡോ. മഞ്ജു കുര്യന്‍ , കായിക വിഭാഗം മേധാവി പ്രൊഫ. ഹാരി ബെന്നി എന്നിവര്‍ അഭിനന്ദിച്ചു
