കോതമംഗലം: ഊര്‍ജിത പ്രചാരണവുമായി മുന്നേറുകയാണ് ഇടുക്കി ലോക്‌സഭാ മണ്ഡലത്തിലെ മുന്നണി സ്ഥാനാര്‍ഥികള്‍. ഡീന്‍ കുര്യാക്കോസിന്റെ സ്ഥാനാര്‍ഥി പര്യടനത്തിന് ദേവികുളം മണ്ഡലത്തിലെ വിവിധ പഞ്ചായത്തുകളില്‍ തുടക്കമിട്ടു. വന്‍ സ്വീകരണമായിരുന്നു സ്വീകരണസ്ഥലങ്ങളിലെല്ലാം. ഇന്നലെ മാങ്കുളം, പള്ളിവാസല്‍, ബൈസന്‍വാലി പഞ്ചായത്തുകളിലാണ് പ്രചാരണത്തിന് എത്തിയത്. രാവിലെ കുറത്തികുടിയില്‍ നിന്നാണ് ആരംഭിച്ചത്. തുടര്‍ന്ന് ആനകുളം, ചിക്കണംകുടി, കുവൈറ്റ് സിറ്റി, മാങ്കുളം സെന്‍ട്രല്‍, കുരിശുപാറ, കല്ലാര്‍, കന്പിലൈന്‍, ആനവിരട്ടി, അന്പഴച്ചാല്‍ എന്നിവിടങ്ങളില്‍ യുഡിഎഫ് സ്ഥാനാര്‍ത്ഥി പ്രചാരണത്തിനെത്തി. രാവിലെ ആനക്കുളത്ത് യുഡിഎഫ് ജില്ല ചെയര്‍മാന്‍ ജോയി വെട്ടിക്കുഴി പര്യടനം ഉദ്ഘാടനം ചെയ്തു. കേരള കോണ്‍ഗ്രസ് നിയോജക മണ്ഡലം പ്രസിഡന്റ് സാജു ജോസ് അധ്യക്ഷത വഹിച്ചു. ഡീന്‍ കുര്യാക്കോസിന്റെ കോതമംഗലം നിയോജക മണ്ഡലം തെരഞ്ഞെടുപ്പ് പര്യടന പരിപാടി ഇന്നു രാവിലെ എട്ടിന് പിണ്ടിമന തൈക്കാവുംപടിയില്‍ ആരംഭിക്കും. കെപിസിസി വൈസ് പ്രസിഡന്റ് വി.റ്റി. ബലറാം ഉദ്ഘാടനം ചെയ്യും. പിണ്ടിമന, കീരന്പാറ, കുട്ടബുഴ, കവളങ്ങാട് പഞ്ചായത്തുകളിലെ നാല്‍പതിലേറെ പ്രധാനപ്പെട്ട കേന്ദ്രങ്ങളില്‍ സ്ഥാനാര്‍ഥിക്ക് സ്വീകരണം ഒരുക്കിയിട്ടുണ്ട്.
വിവിധ സ്വീകരണ യോഗങ്ങളില്‍ യുഡിഎഫ് സംസ്ഥാന ജില്ലാ നേതാക്കള്‍ പങ്കെടുക്കും. പര്യടനത്തിന്റെ സമാപന സമ്മേളനം കവളങ്ങാട് ജംഗ്ഷനില്‍ മുന്‍ മന്ത്രി റ്റി.യു. കുരുവിള ഉദ്ഘാടനം ചെയ്യും.എല്‍ഡിഎഫ് സ്ഥാനാര്‍ഥി ജോയ്‌സ് ജോര്‍ജിന്റെ തൊടുപുഴ നിയോജക മണ്ഡലത്തിലെ പര്യടനവും ആവേശഭരിതമായിരുന്നു. ഇരുപതോളം സ്വീകരണ കേന്ദ്രങ്ങളില്‍ ഇന്നലെ സ്ഥാനാര്‍ഥിയെത്തി. പൂമാല സ്വാമിക്കവലയില്‍ സിപിഎം സംസ്ഥാന കമ്മിറ്റിയംഗം കെ.പി. മേരി ഉദ്ഘാടനം ചെയ്തു. എല്‍ഡിഎഫ് മേഖല കമ്മിറ്റി ചെയര്‍മാന്‍ ജോര്‍ജ് തോമസ് അധ്യക്ഷതവഹിച്ചു.
