ഉദ്പ്പാദന, കാര്‍ഷിക, പശ്ചാത്തല മേഖലകള്‍ക്ക് ഊന്നല്‍ നല്‍കി കുട്ടമ്പുഴ ഗ്രാമപഞ്ചായത്തിന്റെ 2025-26 സാമ്പത്തിക വര്‍ഷത്തെ 55 കോടി രൂപയുടെ (54 കോടി രൂപ ചെലവ്) ബജറ്റ് അവതരണം നടന്നു. പഞ്ചായത്തിന്റെ സമഗ്ര വികസനത്തിനായുള്ള പദ്ധതികളാണ് 2025-26 ബജറ്റില്‍ ഉള്‍പ്പെടുത്തിയിരിക്കുന്നത്. എല്ലാ ശ്രോതസ്സുകളില്‍ നിന്നും വിഭവ സമാഹരണം നടത്തി എല്ലാ വിഭാഗങ്ങളുടെയും ജീവിത നിലവാരം മെച്ചപ്പെടുത്തുന്നതിനുള്ള ബജറ്റില്‍ പാര്‍പ്പിട നിര്‍മ്മാണ/പുനരുദ്ധാരണ പ്രവര്‍ത്തനങ്ങള്‍ക്കും പ്രാധാന്യം നല്‍കുന്നു.
ഉദ്പാദന മേഖലയില്‍ കൃഷി, മൃഗസംരക്ഷണം, ക്ഷീര വികസനം, ചെറുകിട വ്യവസായം, തൊഴില്‍ സംരംഭങ്ങള്‍, നീര്‍ത്തട വികസനം, മണ്ണ് സംരക്ഷണം എന്നിവയ്ക്കുള്‍പ്പടെ 15,33,38,771/- രൂപയും, പശ്ചാത്തല മേഖലയില്‍ പുതിയ നിര്‍മ്മാണങ്ങള്‍ക്കായി (യുവജനങ്ങള്‍ക്കായി സ്റ്റേഡിയങ്ങള്‍, സ്പോര്‍ട്സ് കോംപ്ലക്സ് ഉള്‍പ്പടെ) 13,64,60,000/- രൂപയും, മെയിന്റനന്‍സ് പ്രവൃത്തികള്‍ക്കായി 6,97,70,000/- രൂപയും, സേവന മേഖലയില്‍ എസ്.എസ്.എ. പദ്ധതി, പൊതു ആരോഗ്യ പരിപാടികള്‍, കുടിവെള്ള പദ്ധതികള്‍, ഭവന നിര്‍മ്മാണം, ശുചിത്വം, വനിതാ-ശിശു-വൃദ്ധ ക്ഷേമ പരിപാടികള്‍, ശാരീരിക മാനസിക വെല്ലുവിളികള്‍ നേരിടുന്നവര്‍ക്കുള്ള പദ്ധതികള്‍, അഗതി ക്ഷേമപരിപാടികള്‍, പട്ടികജാതി പട്ടികവര്‍ഗ്ഗ ക്ഷേമ പദ്ധതികള്‍ എന്നിവയ്ക്കായി 6,77,12,800/- രൂപയും എന്നിങ്ങനെ സമഗ്രമായ വികസനത്തിന്‌ ഉതകുന്ന തരത്തിലുള്ള പദ്ധതികളാണ് ബജറ്റില്‍ അവതരിപ്പിച്ചത്. ഗ്രാമപഞ്ചായത്ത് പ്രസിഡന്റ് ശ്രീമതി. കാന്തി വെള്ളക്കയ്യന്‍ അധ്യക്ഷത വഹിച്ച യോഗത്തില്‍ വൈസ് പ്രസിഡന്റ് ശ്രീമതി. സല്‍മ പരീത് ബജറ്റ് അവതരിപ്പിച്ചു. സ്റ്റാന്റിംഗ് കമ്മിറ്റി ചെയര്‍മാന്‍മാരായ ശ്രീ. സിബി കെ എ, ഇ സി റോയി, ശ്രീമതി. മിനി മനോഹരന്‍, മറ്റു വാര്‍ഡ്‌ മെമ്പര്‍മാര്‍, പഞ്ചായത്ത് സെക്രട്ടറി, അസി. സെക്രട്ടറി, അക്കൗണ്ടന്റ്, നിര്‍വ്വഹണ ഉദ്യോഗസ്ഥര്‍ എന്നിവര്‍ ബജറ്റ് അവതരണത്തില്‍ പങ്കെടുത്തു.
