കോതമംഗലം : കോതമംഗലം താലൂക്ക് ഭൂമി തരം മാറ്റം സ്പെഷ്യൽ അദാലത്ത്സംഘടിപ്പിച്ചു . സംസ്ഥാനത്തെ വിവിധ റവന്യൂ ഓഫീസുകളിൽ സമർപ്പിക്കപ്പെട്ടിട്ടുള്ള തരം മാറ്റ അപേക്ഷകൾ തീർപ്പാക്കുന്നതിന്റെ ഭാഗമായിട്ടാണ് സംസ്ഥാനത്ത് സ്പെഷ്യൽ അദാലത്തുകൾ സംഘടിപ്പിച്ച് വരുന്നത് .25 സെന്റ് വരെ വിസ്തീർണ്ണം ഉള്ള ഭൂമികളിൽ മേൽ സമർപ്പിക്കപ്പെട്ടിരിക്കുന്ന തരം മാറ്റൽ ഫോറം 5, ഫോറം 6 അപേക്ഷകളിൽ 31/8/24 വരെ യുള്ള 1000 ത്തോളം അപേക്ഷകൾ അദാലത്തിൽ തീർപ്പായതായി ആന്റണി ജോൺ എം എൽ എ അറിയിച്ചു.
2024 ഒക്ടോബർ 25 മുതൽ നവംബർ 15 വരെയാണ് സംസ്ഥാനത്ത് അദാലത്തുകൾ സംഘടിപ്പിച്ചിട്ടുള്ളത്. കോതമംഗലം എം എ കോളേജ് ഇൻഡോർ സ്റ്റേഡിയത്തിൽ സംഘടിപ്പിച്ചിട്ടുള്ള കോതമംഗലം താലൂക്ക് തല സ്പെഷ്യൽ അദാലത്തിന് ജില്ലാ കളക്ടർ എൻ എസ് കെ ഉമേഷ് ഐ എ എസ്, മുവാറ്റുപുഴ ആർ ഡി ഒ അനി പി എൻ, തഹസിൽദാർ എം അനിൽകുമാർ , എൽ ആർ തഹസിൽദാർ മായ എം, സീനിയർ സൂപ്രണ്ട് രേഖ എൻ,ഡെപ്യൂട്ടി തഹസിൽദാർമാർ, വില്ലേജ് ഓഫീസർമാർ,കൃഷി ഓഫീസർമാർ എന്നിവർ നേതൃത്വം നൽകി.
