കോതമംഗല : ആഗോള സർവ്വമത തീർത്ഥാടന കേന്ദ്രമായ കോതമംഗലം മാർതോമ ചെറിയപള്ളിയിലെ ചരിത്ര പ്രസിദ്ധമായ കന്നി 20 പെരുന്നാളിന് നേർച്ച കഞ്ഞി വിതരണം ചെയ്യുവാനുള്ള പന്തലിൻ്റെ കാൽ നാട്ടുകർമ്മം നിർവ്വഹിച്ചു. പ്രധാന പെരുന്നാൾ തലേ ദിവസമായ ഒക്ടോബർ 2 ന് രാവിലെ 8 മണി മുതൽ രാത്രി 12 മണി വരെ പള്ളിയിൽ വരുന്ന ലക്ഷക്കണക്കിന് തീർത്ഥാടകർക്ക് ഭക്ഷണം നൽകുന്നതിനായി ഒരുക്കുന്ന പടുകൂറ്റൻ പന്തലിൻ്റെ കാൽനാട്ടുകർമ്മം വികാരി ഫാ. ജോസ് പരത്തുവയലിൽ നിർവ്വഹിച്ചു.
മഹാപരിശുദ്ധനായ യൽദോ മാർ ബസേലിയോസ് ബാവായുടെ കബറിങ്കൽ ധൂപപ്രാർത്ഥനയ്ക്ക് ശേഷം ഘോഷയാത്രയായാണ് പ്രത്യേകം തയ്യാറാക്കി അലങ്കരിച്ച കാൽ മൈതാനത്തിലേക്ക് കൊണ്ടു പോയത് കോതമംഗലം എം.എൽ.എ ആൻ്റണി ജോൺ, മതമൈത്രി സംരക്ഷണ സമിതി ചെയർമാൻ എ.ജി. ജോർജ്ജ്, കൺവിനർ കെ.എ നൗഷാദ് സഹവികാരിമാരായ ഫാ. ജോസ് തച്ചേത് കുടി, ഫാ. ഏലിയാസ് പൂമറ്റത്തിൽ, ഫാ. ബിജോ കാവാട്ട്, ഫാ. ബേസിൽ ഇട്ടിയാണിയ്ക്കൽ, ട്രസ്റ്റിമാരായ ബേബി ആഞ്ഞിലിവേലിൽ,ഏലിയാസ് കീരംപ്ലായിൽ , സലിം ചെറിയാൻ മാലിൽ, ബേബി പാറേക്കര, എബി ചേലാട്ട്, ബിനോയി മണ്ണൻചേരിൽ, ഡോ. റോയി മാലിൽ മാനേജിംഗ് കമ്മിറ്റി അംഗങ്ങൾ ഭക്തസംഘടനാ പ്രവർത്തകർ എന്നിവർ സംബന്ധിച്ചു.
