കോതമംഗലം: സംസ്ഥാനത്ത് നടത്തി വരുന്ന വൃക്ഷത്തൈവിതരണം ഘട്ടംഘട്ടമായി കുറക്കാൻ തീരുമാനിച്ചിരിക്കുകയാണെന്ന് സോഷ്യല്‍ ഫോറസ്ട്രി വിഭാഗം ഡിഎഫ്ഒ എ. ജയമാധവന്‍ പറഞ്ഞു. ചേലാട് സെന്റ് ഗ്രിഗോറിയോസ് ഡന്റല്‍ കോളേജില്‍ ഫോറസ്ട്രി ക്ലബ്ബ് ഉദ്ഘാടന ചടങ്ങില്‍ മുഖ്യപ്രഭാഷണം നടത്തുകയായിരുന്നു ഡി എഫ് ഒ.
സംസ്ഥാനത്ത് ഓരോ വര്‍ഷവും ലക്ഷക്കണക്കിന് വൃക്ഷത്തൈകളാണ് വിതരണം ചെയ്തിരുന്നത്.ഇതെല്ലാം വളര്‍ന്നിരുന്നെങ്കില്‍ നടക്കാന്‍ ഇടം ഉണ്ടാകുമായിരുന്നില്ല. ലക്ഷ്യം കാണുന്നില്ലെന്ന്് വ്യക്തമായ സാഹചര്യത്തിലാണ് വൃക്ഷത്തൈവിതരണം കുറക്കുവാൻ തീരുമാനിച്ചതെന്നും ഡി എഫ് ഒ വ്യക്തമാക്കി.
ഫോറസ്ട്രീ ക്ലബ്ബിന്റേയും ബയോ ഡൈവേഴ്‌സിറ്റി ദിനാചരണത്തിന്റേയും ഉദഘാടനം മുന്‍ മന്ത്രി ടി.യു.കുരുവിള നിര്‍വഹി്ച്ചു.റേഞ്ച് ഓഫിസര്‍ എ.ലക്ഷ്മി,പ്രിന്‍സിപ്പൽ ഡോ.ജയിന്‍ മാത്യു,ഡോ.മന്യാ മരിയ എബി,ഡോ.ജിജി കെ.ജോസഫ്,എന്നിവര്‍ പ്രസംഗിച്ചു.കോളേജ് കാമ്പസില്‍ വിദ്യാവനം പദ്ധതി പ്രകാരം വനവത്ക്കരണം നടപ്പാക്കാനുള്ള ധാരണാപത്രം ചടങ്ങില്‍ കൈമാറി.
