കോതമംഗലം: കാട്ടുപോത്തിൻ്റെ ആക്രമണത്തിൽ വനംവകുപ്പ് ഫയർ വാച്ചർക്ക് പരിക്ക്. കുട്ടമ്പുഴ പഞ്ചായത്തിലെ തേരക്കുടി ആദിവാസി കോളനിയിലെ
സജീവൻ ആണ്ടി (54) ക്കാണ് പരിക്കേറ്റത്.ഇന്നലെ രാവിലെ പതിനൊന്നോടെ ജോലികഴിഞ്ഞ് മടങ്ങുന്നതിനിടെ കാനനപാതയിൽ പാമ്പ്കുത്തിപ്പാറയിൽ വച്ചാണ് കാട്ടുപോത്തിൻ്റെ ആക്രമണമുണ്ടായത്.
ഇടമലയാര്‍ വനത്തിലെ എണ്ണക്കല്ലില്‍ വനംവകുപ്പിന്റെ ഫയര്‍വാച്ചറായ സജീവന്‍ ആണ്ടി ഒരാഴചത്തെ ഡ്യൂട്ടിക്ക് ശേഷം വീട്ടിലേക്ക മടങ്ങുന്നതിനിടെയാണ് സജീവനെ കാട്ടുപോത്ത് ആക്രമിച്ചത്.
വനപാതയില്‍വച്ചാണ് സംഭവം.ഒപ്പമുണ്ടായിരുന്നവര്‍ സജീവിന് ഏറെ മുമ്പിലാണ് നടന്നിരുന്നത്.അവര്‍ വിവരം അറിഞ്ഞതുമില്ല.സജീവന്‍ തനിയെ നടന്ന് വീട്ടിലെത്തുകയായിരുന്നു.ഒരു പോത്ത് മാത്രമാണുണ്ടായിരുന്നതെന്ന് സജീവന്‍ പറഞ്ഞു.സജീവന്റെ വയറിന്റെ ഭാഗത്ത് ആഴത്തിലുള്ള മുറിവേറ്റിട്ടുണ്ട്.നെഞ്ചിനും നെറ്റിയിലും പരിക്കുണ്ട്.
കോതമംഗലം താലൂക്ക് ആശുപത്രിയില്‍ എത്തിച്ച് പ്രഥമ ശുശ്രൂഷ നല്‍കിയശേഷം സജീവനെ കളമശ്ശേരി മെഡിക്കല്‍ കോളേജ് ആശുപത്രിയില്‍ വിധക്ത ചികിത്സക്കായി പ്രവേശിപ്പിച്ചു.
