കോതമംഗലം : കോതമംഗലം എം. എ. കോളേജ് നീന്തൽ കുളത്തിൽ നടന്ന ഇരുപത്തിരണ്ടാമത് എറണാകുളം ജില്ല ജൂനിയർ, സബ് ജൂനിയർ നീന്തൽ ചാമ്പ്യൻഷിപ്പിൽ ജൂനിയർ വിഭാഗത്തിൽ 659 പോയിന്റ്‌ നേടി കളമശ്ശേരി രാജഗിരി സ്വിമ്മിംഗ് അക്കാദമി ഒന്നാമതത്തി. സബ് ജൂനിയർ വിഭാഗത്തിൽ225 പോയിന്റ്‌ നേടി അങ്കമാലി വിശ്വജ്യോതിയാണ് ഒന്നാമത്.ജൂനിയർ വിഭാഗത്തിൽ 352 പോയിന്റ്‌ നേടി അങ്കമാലി വിശ്വ ജ്യോതി അക്കാദമി രണ്ടാം സ്ഥാനവും,339 പോയിന്റ്‌ നേടി കടവന്ത്ര റീജിയണൽ സ്പോർട്സ് സെന്റർ മൂന്നാം സ്ഥാനവും നേടി.സബ് ജൂനിയർ വിഭാഗത്തിൽ 159 പോയിന്റ്‌ നേടി കളമശ്ശേരി രാജഗിരി രണ്ടാം സ്ഥാനവും,96 പോയിന്റ്‌ നേടി കടവന്ത്ര റീജിയണൽ സ്പോർട്സ് സെന്റർ മൂന്നാം സ്ഥാനവും കരസ്ഥമാക്കി. രണ്ടു ദിവസമായി നടന്ന മത്സരത്തിൽ
28 സ്ഥാപനങ്ങളിൽ നിന്നായി 300ൽ പരം നീന്തൽ താരങ്ങളാണ് പങ്കെടുത്തത്.
ജില്ലാ അക്വാട്ടിക് അസോസിയേഷൻ പ്രസിഡന്റ് ജോർജ് ജോസിന്റെ അധ്യക്ഷതയിൽ നടന്ന
സമാപന സമ്മേളനത്തിൽ എം. എ. കോളേജ് അസോസിയേഷൻ സെക്രട്ടറി ഡോ. വിന്നി വറുഗീസ് സമ്മാനദാനം നിർവഹിച്ചു .ഡോ. മാത്യൂസ് ജേക്കബ്,ജോർജ് ഷിൻഡെ,എം. കെ. കുഞ്ഞുമോൻ, പ്രൊഫ. പി. ഐ ബാബു എന്നിവർ പ്രസംഗിച്ചു.ഒന്നും രണ്ടും, മൂന്നും സ്ഥാനങ്ങൾ നേടിയവർ ജൂൺ 14 മുതൽ തിരുവനന്തപുരത്ത് വച്ച് നടക്കുന്ന സംസ്ഥാന നീന്തൽ ചാമ്പ്യൻഷിപ്പിൽ മത്സരിക്കും.
