പാലം നിർമ്മാണം കുളിക്കടവ് ഇല്ലാതാക്കിയതായി പരാതി

കോതമംഗലം : നടുക്കുടി കടവില്‍ പാലം നിർമ്മാണം പൂർത്തീകരിച്ച് ഗതാഗത സൗകര്യം വർദ്ധിപ്പിക്കുമ്പോൾ കുളിക്കടവ് ഇല്ലാതാക്കിയതായി പരാതി. വാരപ്പെട്ടി പഞ്ചായത്തിനേയും കോതമംഗലം മുൻസിപ്പാലിറ്റിയെയും തമ്മില്‍ ബന്ധിപ്പിച്ചാണ് വാരപ്പെട്ടി നടുക്കുടി കടവില്‍ പുതിയ പാലം നിര്‍മ്മാണം പൂർത്തികരിച്ച് വരുന്നത്.

അവസാനമിനുക്ക് പണികള്‍ പൂര്‍ത്തിയാക്കുന്നതോടെ പാലം ഗതാഗത സജ്ജമാകും.ഈ പാലം വിവിധ പ്രദേശങ്ങളിലുള്ളവര്‍ക്ക് യാത്രാസൗകര്യം വര്‍ദ്ധിപ്പിക്കുമ്പോള്‍ കുളിക്കാനും അലക്കാനും ഉണ്ടായിരുന്ന സൗകര്യം ഇല്ലാതാക്കിയെന്ന പരാതിയാണ് ഉയരുന്നത്.പഞ്ചായത്തിന്റേയും മുനിസിപ്പാലിറ്റിയുടേയും ഭാഗങ്ങളില്‍ ഉണ്ടായിരുന്ന കുളിക്കടവാണ് പാലം നിര്‍മ്മിച്ചതോടെ ഇല്ലാതായത്.ഇപ്പോള്‍ പുഴയിലേക്ക് ഇറങ്ങാന്‍ കഴിയാത്ത സാഹചര്യമാണ്.വേനല്‍ക്കാലത്ത് നാട്ടുകാര്‍ മാത്രമല്ല,വിദൂരപ്രദേശങ്ങളില്‍നിന്നുള്ളവരും കുളിക്കാനും അലക്കാനും ഈ കടവലെത്തിയിരുന്നതാണ്.പാലത്തിന്റെ നിര്‍മ്മാണം ആരംഭിച്ചഘട്ടത്തില്‍തന്നെ കുളിക്കടവ് നിലനിറുത്തണമെന്ന് നാട്ടുകാര്‍ ആവശ്യപ്പെട്ടിരുന്നു.എന്നാല്‍ ഒരു പരിഗണനയും കരാറുകാര്‍ നല്‍കിയില്ല.സമീപത്തുള്ള കുടിവെള്ള പദ്ധതിയുടെ പമ്പ് ഹൗസിലേക്കുള്ള വഴിയും പാലം നിര്‍മ്മിച്ചതോടെ ഇല്ലാതായിട്ടുണ്ട്.കുളിക്കടവ് പുനസ്ഥാപിക്കണമെന്ന് ആവശ്യപ്പെട്ട് നാട്ടുകാര്‍ അധികൃതര്‍ക്ക് നിവേദനം നല്‍കിയിട്ടുണ്ട്.എത്രയുംവേഗം ഇക്കാര്യത്തില്‍ നടപടിയെടുക്കണമെന്നാണ് നാട്ടുകാരുടെ ആവശ്യം.കുത്തിയൊഴുകിയെത്തുന്ന മഴവെള്ളം സമീപത്തെ കൃഷിയിടങ്ങളിലേക്ക് തിരിച്ചുവിട്ടതായും പരാതിയുണ്ട്.ഇതൂമൂലം കൃഷി ചെയ്യാന്‍ കഴിയാത്ത സ്ഥിതിയാണെന്നും ആക്ഷേപമുണ്ട്.