കോതമംഗലം : സി.ഐ.എസ്.സി.ഇ സ്കൂളുകളുടെ കൗൺസിൽ ഉത്തർപ്രദേശിലെ ജാൻസിയിൽ നടത്തിയ ദേശീയ കരാട്ടെ ചാമ്പ്യൻഷിപ്പിൽ മെഡലുകൾ നേടിയ കോതമംഗലം മാർ അത്തനേഷ്യസ് ഇന്റർ നാഷണൽ സ്കൂളിലെ വിദ്യാർത്ഥികളും, കോതമംഗലം റോട്ടറി കരാട്ടെ ക്ലബ്ബിലെ അംഗങ്ങളുമായ താരങ്ങളെ റോട്ടറി ഭവനിൽ നടന്ന അനുമോദന ചടങ്ങിൽ ഉപഹാരങ്ങൾ നൽകി ആദരിച്ചു.സ്വീകരണ സമ്മേളനം ആന്റണി ജോൺ എം എൽ എ ഉദ്ഘാടനം ചെയ്തു. റോട്ടറി കരാട്ടെ ക്ലബ്ബ് പ്രസിഡന്റ്‌ അഡ്വ. കെ.ഐ ജേക്കബ് അധ്യക്ഷത വഹിച്ചു. സാങ്കേതിക സർവകലാശാല സിൻഡിക്കേറ്റ് മെമ്പർ പ്രൊഫ. ഡോ. വിനോദ് കുമാർ ജേക്കബ് മുഖ്യപ്രഭാഷണം നടത്തി. റോട്ടറി ക്ലബ്ബ് ട്രഷറർ ചേതൻ റോയി, എറണാകുളം ജില്ലാ കരാട്ടെ ദോ അസോസിയേഷൻ ഭരണസമിതി അംഗങ്ങളായ റെനി പോൾ, സോഫിയ എൽദൊ, ജയ സതീഷ് എന്നിവർ പ്രസംഗിച്ചു.
ആൺ കുട്ടികളുടെ 19 വയസിനു താഴെ -82 കിലോ വിഭാഗത്തിൽ അച്ചുത് മനീഷ്, പെൺകുട്ടികളുടെ 19 വയസിനു താഴെ -40 കിലോ വിഭാഗത്തിൽ സാറ സോബിൻ എന്നിവർ ജേതാക്കളായി സ്വർണം കരസ്ഥമാക്കി. ഇരുവരും മഹാരാഷ്ട്രയിൽ നടക്കുന്ന സ്കൂൾ ഗെയിംസ് ഫെഡറേഷൻ ഓഫ് ഇന്ത്യ മത്സരത്തിൽ പങ്കെടുക്കുവാൻ അർഹത നേടി.
പെൺകുട്ടികളുടെ -68 കിലോ വിഭാഗത്തിൽ സെയിൻ തംരൻ വെങ്കലവും പെൺകുട്ടികളുടെ 14 വയസിനു താഴെ -40 കിലോ വിഭാഗത്തിൽ മറിയം ഹന്ന എൽസൺ വെങ്കലവും നേടിയത് കോതമംഗലത്തിന് അഭിമാന നേട്ടമായി.സോഷിഹാൻ ജോയി പോൾ ആണ് മുഖ്യ പരിശീലകൻ. എറണാകുളം ജില്ലാ സ്പോർട്സ് കൗൺസിൽ ഭരണസമിതി അംഗം ജോയി പോൾ സ്വാഗതവും എം.എ ഇന്റർനാഷണൽ സ്കൂൾ കരാട്ടെ കോച്ച് ആൻ മരിയ ഷാജൻ കൃതജ്ഞതയും പറഞ്ഞു.
