കോതമംഗലം : മാമലക്കണ്ടത്ത് കാട്ടുപന്നി സ്കൂട്ടറില് ഇടിച്ച് യുവാവിന് പരിക്ക്. സ്കൂട്ടറിനും കേടുപാടുകള് സംഭവിച്ചു. നേര്യമംഗലം ആവോലിച്ചാല് സ്വദേശി തന്നിക്കുന്നേല് ടി.ടി. രവി (40)യ്ക്കാണ് പരിക്കേറ്റത്. മാമലകണ്ടം ഇളംപ്ലാശേരി വനദുര്ഗാ ദേവി ക്ഷേത്രത്തിനു സമീപം ബാര്ബര് ഷോപ്പ് നടത്തുന്ന രവി വ്യാഴാഴ്ച രാത്രി 7.30ഓടെ സ്കൂട്ടറില് സഞ്ചരിക്കുമ്പോള് ഇളംപ്ലാശേരി ക്ഷേത്ര പരിസരത്തുവച്ചായിരുന്നു അപകടം. റോഡിന് കുറുകെ ചാടിയ കാട്ടുപന്നി ഇടിച്ച് സ്കൂട്ടര് മറിഞ്ഞ് രവി റോഡില് വീഴുകയായിരുന്നു. ഉടനെ അതുവഴി വന്ന ഓട്ടോറിക്ഷയിലെ യാത്രക്കാര് രവിയെ സമീപത്തെ ആശുപത്രിയിലെത്തിച്ച് ചികിത്സ നല്കി. കാലിനും തലയ്ക്കും അസ്വസ്ഥത അനുഭവപ്പെടുന്ന രവി കോതമംഗലത്ത് ആശുപത്രിയില് വിദഗ്ധ ചികിത്സയിലാണ്.
