കോതമംഗലം : നെല്ലിക്കുഴി -314 റോഡിന്റെ തുടക്കത്തില്‍ റോഡ്സൈഡില്‍ കഴിഞ്ഞ രാത്രിയില്‍ നടന്ന അനധികൃത നിര്‍മ്മാണം പൊളിച്ച് നീക്കണമെന്ന് പി.ഡി.പി.നെല്ലിക്കുഴി പഞ്ചായത്ത് കമ്മിറ്റി അധികൃതരോട് ആവശ്യപ്പെട്ടു. 23 കോടി രൂപ വകയിരുത്തി കിഫ്ബി പദ്ധതിയില്‍പ്പെടുത്തി നിര്‍മ്മാണം ആരംഭിക്കുകയും റോഡിന് വീതി കുറവാണെന്ന കാരണം പറഞ്ഞ് പാതിവഴിയില്‍ ഉപേക്ഷിക്കുകയും ചെയ്ത പ്ളാമുടി -ഊരംകുഴി റോഡിലെ നെല്ലിക്കുഴി -314 റോഡിന്റെ കവാടത്തിലാണ് അനധികൃത നിര്‍മ്മാണം നടന്നിട്ടുള്ളത്. ടി റോഡിന്റെ അറ്റകുറ്റപ്പണികള്‍ക്കായി 82 ലക്ഷത്തോളം രൂപയുടെ പദ്ധതി തയ്യാറാക്കി നിര്‍മ്മാണ പ്രവര്‍ത്തനങ്ങള്‍ ആരംഭിച്ചിട്ടുള്ള ഘട്ടത്തിലാണ് നെല്ലിക്കുഴി -ചെറുവട്ടൂര്‍ റോഡില്‍ നിന്ന് പ്രസ്തുത റോഡിലേക്കുള്ള കാഴ്ച മറക്കുന്ന നിലയില്‍ അനധികൃത നിര്‍മ്മാണം ആരംഭിച്ചിട്ടുള്ളത്.
പ്രസ്തുത നിര്‍മ്മാണത്തിന് പിന്നില്‍ സ്വകാര്യ വ്യക്തികളാണെങ്കിലും രാഷ്ട്രീയ സംഘടനകളാണെങ്കിലും പ്രതിഷേധാര്‍ഹമാണെന്നും നിര്‍മ്മാണം തടയാന്‍ തടയാന്‍ നടപടിയുണ്ടാകണമെന്നും പി.ഡി.പി. പഞ്ചായത്ത് കമ്മിറ്റി അധികാരികളോടും പൊതുമരാമത്ത് വകുപ്പ് അധികൃതരോടും ആവശ്യപ്പെട്ടു.
