കോതമംഗലം : വിദ്യാർത്ഥികളുടെ ആരോഗ്യവും ക്ഷേമവും ഉറപ്പുവരുത്തുക എന്ന പ്രധാന ലക്ഷ്യത്തോടെ കുടുംബശ്രീയുടെ ‘മാ-കെയർ’ പദ്ധതിയ്ക്ക് കവളങ്ങാട് പഞ്ചായത്തിൽ തുടക്കമായി. നേര്യമംഗലം ഗവൺമെന്റ് ഹയർ സെക്കൻഡറി സ്കൂളിൽ ആരംഭിച്ച മാ – കെയർ പദ്ധതിയുടെ ഉദ്ഘാടനം ആന്റണി ജോൺ എം എൽ എ നിർവഹിച്ചു. പഞ്ചായത്ത് പ്രസിഡന്റ് ഇൻ ചാർജ് നൗഷാദ് ടി എച്ച് അധ്യക്ഷത വഹിച്ച ചടങ്ങിൽ കവളങ്ങാട് സി ഡി എസ് ചെയർപേഴ്സൺ ജമീല ഷംസുദ്ദീൻ സ്വാഗതം ആശംസിച്ചു. കുടുംബശ്രീ ജില്ലാ മിഷൻ കോർഡിനേറ്റർ റെജീന ടി എം പദ്ധതി വിശദീകരണം നടത്തി. ബ്ലോക്ക് പഞ്ചായത്ത് ഡിവിഷൻ മെമ്പർ പിഎം കണ്ണൻ, വാർഡ് മെമ്പർമാരായ സൗമ്യ ശശി, സുഹറ ബഷീർ, നേര്യമംഗലം ഗവണ്മെന്റ് വി എച്ച് എസ് ഇ പ്രിൻസിപ്പൽ ശ അജി സി എസ്, ഗവൺമെന്റ് ഹയർസെക്കൻഡറി സ്കൂൾ പ്രിൻസിപ്പൽ മഞ്ജു വി ആർ, കുടുംബശ്രീ ജില്ലാ മിഷൻ എ ഡി എം സി അനുമോൾ കെ സി, ഡി പി എം അജിത് പി, സി ഡി എസ് മെംബേർസ്, എ ഡി എസ് അംഗങ്ങൾ, അധ്യാപകർ, അനധ്യാപകർ, കുട്ടികൾ, സംരംഭകർ, എന്നിവർ പങ്കെടുത്തു.
ഈ പദ്ധതിയിലൂടെ വിദ്യാർത്ഥികൾക്ക് സ്കൂൾ കോമ്പൗണ്ടിനകത്ത് തന്നെ പോഷകസമ്പുഷ്ടമായ ലഘുഭക്ഷണങ്ങൾ, ആരോഗ്യകരമായ പാനീയങ്ങൾ, സ്കൂൾ സ്റ്റേഷനറി സാധനങ്ങൾ, സാനിറ്ററി നാപ്കിനുകൾ തുടങ്ങിയവ ലഭ്യമാകും. സ്കൂൾ കാലഘട്ടത്തിൽ തന്നെ ആരോഗ്യശീലങ്ങൾ വളർത്തുകയും ശാരീരികമായും മാനസികമായും വിദ്യാർത്ഥികളുടെ സമഗ്രമായ വികസനം ഉറപ്പാക്കുകയും ചെയ്യുന്നതാണ് പദ്ധതിയുടെ പ്രധാന ലക്ഷ്യം. കുട്ടികളിൽ ലഹരിവിമുക്തവും ആരോഗ്യസമ്പന്നവുമായ ഒരു തലമുറയെ വളർത്താനുള്ള ലക്ഷ്യത്തോടെയാണ് പദ്ധതി ആരംഭിച്ചിരിക്കുന്നത്.
