കോതമംഗലം: യുവത്വത്തിൻ്റെ കരുത്ത് വിളിച്ചോതി കോതമംഗലം ടൗണിൽ യുഡിവൈഎഫ് റോഡ് ഷോ. യുഡിഎഫ് സ്ഥാനാർഥി ഷിബു തെക്കുംപുറത്തിൻ്റെ പ്രചാരണത്തിൻ്റെ ഭാഗമായാണ് വർണാഭമായ റോഡ്ഷോ നടന്നത്. കോഴിപ്പിള്ളി ജംഗ്ഷനൽ നിന്നാരംഭിച്ച ഘോഷയാത്രയിൽ നൂറുകണക്കിന് യുവാക്കൾ അണിനിരന്നു. ആദ്യം ഷിബു തെക്കും പുറത്തിൻ്റെ ചിഹ്നമായ ട്രാക്ടറുകൾ പിന്നാലെ അനൗൺസ്മെൻ്റ് വാഹനങ്ങളുടെ നീണ്ടനിര. വർണ കാവടി, ചെണ്ടയിൽ ഇമ്പമാർന്ന അസുരതാളം തീർത്ത് യുവാക്കൾ, നാസിക് ഡോളിൻ്റെ കമ്പനങ്ങൾക്ക് പിന്നാലെ തുറന്ന ജീപ്പിൽ സ്ഥാനാർഥി ഷിബു തെക്കുംപുറവും നടൻ രമേഷ് പിഷാരടിയും. തുടർന്ന് അണമുറിയാതെ യുവജന പ്രവാഹം. ഷിബു തെക്കുംപുറം വിജയിക്കേണ്ടത് കോതമംഗലത്തെ അടിസ്ഥാന വിഭാഗം ജനങ്ങളുടെ ആവശ്യമാണെന്ന് രമേഷ് പിഷാരടി.
കേരളത്തിൽ ഷിബുവിനെ പോലെ ജനങ്ങളുടെ അടിസ്ഥാന ആവശ്യങ്ങൾ സ്വന്തം നിലയിൽ പരിഹാരം കാണുന്ന ഒരു സ്ഥാനാർഥിയും ഉണ്ടാവില്ലെന്നും പിഷാരടി അഭിപ്രായപ്പെട്ടു.
യൂത്ത് കോൺഗ്രസ്, യൂത്ത് ലീഗ്, യൂത്ത് ഫ്രണ്ട്, യൂത്ത് ഫ്രണ്ട് ജേക്കബ്, കെഎസ് യു പ്രവർത്തകരാണ് റോഡ്ഷോയിൽ അണിനിരന്നത്. ടി.എം.അമീൻ, കെ.എ. റമീസ്, ബേസിൽ തണ്ണിക്കോട്ട്, ലിനോ തോമസ്, അനൂപ് ഇട്ടൻ, എബി കുര്യക്കോസ്, ജയിൻ ജോസ്, അരുൺ അയ്യപ്പൻ, അബുബക്കർ, അൻസാരി കുന്നേക്കുടി, അബുബക്കർ ഇട്ടിപ്പാറ, പി.എം. സിദ്ധിഖ്, ബിജോഷ് മാത്യൂസ് എന്നിവർ നേതൃത്വം നൽകി.
