മൂവാറ്റുപുഴ: അനധികൃതമായി കഞ്ചാവ് ചെടി നട്ടുവളര്‍ത്തി പരിപാലിച്ച പശ്ചിമ ബംഗാള്‍ സ്വദേശിക്ക് കഠിന തടവും പിഴയും ശിക്ഷ വിധിച്ച് മൂവാറ്റുപുഴ കോടതി. പശ്ചിമ ബംഗാള്‍ സ്വദേശി നന്തു മൊണ്ടാല്‍ (30)നാണ് മൂവാറ്റുപുഴ അഡീഷ്ണല്‍ ഡിസ്ട്രിക്ട് സെഷന്‍സ് കോടതി ജഡ്ജി കെ.എന്‍.ഹരികുമാര്‍ ഒരു വര്‍ഷം കഠിന തടവും 50,000 രൂപ പിഴയും ശിക്ഷ വിധിച്ചത്.
2025 ഏപ്രില്‍ 27നാണ് മാറമ്പിള്ളി എം.ഇ.എസ്.കോളേജ് റോഡിനു സമീപമുള്ള കെട്ടിടത്തിന്റെ ഒന്നാം നിലയില്‍ വാടകക്ക് താമസിച്ചിരുന്ന പ്രതി വരാന്തയില്‍ നട്ട് വളര്‍ത്തി പരിപാലിച്ചുവന്ന കഞ്ചാവ് ചെടി പെരുമ്പാവൂര്‍ എക്സൈസ് ഇന്‍സ്‌പെക്ടര്‍ വിനോദ് കെയും സംഘവും ചേര്‍ന്ന് കണ്ടെത്തിയത്. കുന്നത്ത്‌നാട് എക്സൈസ് സര്‍ക്കിള്‍ ഇന്‍സ്‌പെക്ടര്‍ ബിനു എസ് ആണ് പ്രതിക്കെതിരെ കുറ്റപത്രം ഹാജരാക്കിയത്. പ്രോസിക്യംഷനായി അഡീ. പബ്ലിക് പ്രോസിക്യൂട്ടര്‍ കെ.എസ്.ജ്യോതികുമാര്‍ ഹാജരായി.
