കോതമംഗലം : പുതുവർഷപ്പുലരിയിൽ പെരിയാറ്റിൽ കാണാതായ തട്ടേക്കാട് പക്ഷി സങ്കേതത്തിലെ വാച്ചറുടെ മൃതദേഹം ഇന്ന് കണ്ടെത്തി. തട്ടേക്കാടിന് സമീപം ഞായപ്പിള്ളിയിൽ താമസിക്കുന്ന വടക്കേക്കര എൽദോസിനെ ഒന്നാം തീയതി രാവിലെ മുതൽ കാണാതായിരുന്നു.
ഓവുങ്കൽ കടവിൽ ഡ്യൂട്ടിയിലായിരുന്ന എൽദോസും മറ്റൊരു വാച്ചറും വള്ളത്തിൽ മടങ്ങുമ്പോഴാണ് എൽദോസിനെ കാണാതായത്. എൽദോസിനെ കാണാതായ വിവരം അറിഞ്ഞതോടെ ഫയർഫോഴ്സ്, വനം വകുപ്പ് ,പോലീസ്, നാട്ടുകാർ എന്നിവർ പെരിയാറ്റിലും, വന മേഖലയിലും വ്യാപകമായി തെരച്ചിൽ നടത്തിവരികയായിരുന്നു. പെരിയാറിൽ ചെട്ടിപ്പിള്ളി ഭാഗത്താണ് തിങ്കൾ ഉച്ചയോടെ മൃതദേഹം കണ്ടെത്തിയത്. പോലീസ് മേൽനടപടികൾ സ്വീകരിച്ചു.
ഫയർഫോഴ്സ് സ്കൂബാ ടീം , പോലീസ്, ഫോറസ്റ്റ് പ്രദേശവാസികൾ തുടങ്ങിയവരുടെ നേതൃത്വത്തിൽ ആയിരുന്നു തിരച്ചിൽ . ഒന്നാം തീയതി രാവിലെ മുതൽ ആയിരുന്നു കാണാതായിരുന്നത്. ഡ്യൂട്ടിയിലായിരുന്ന എൽദോസ് മറ്റൊരു വാച്ചറായ രാജനൊപ്പം സഞ്ചരിക്കുന്നത് കണ്ടതായി ദൃക്സാക്ഷികൾ പറഞ്ഞു. ഇതിന് ശേഷമാണ് എൽദോസിനെ കാണാതാകുന്നത്. . ഒന്നിച്ച് ജോലി ചെയ്യുന്ന എൽദോസ് കൂടെ വന്നതിന് ശേഷം മറ്റൊരു സ്ഥലത്ത് ഇറങ്ങി എന്നാണ് രാജൻ്റെ മൊഴി. പിന്നീട് രാജൻ മൊഴി മാറ്റിപ്പറയുകയും ചെയ്യുന്നതായി പോലീസ് പറയുന്നു.
കഴിഞ്ഞ ദിവസം സ്കൂബാ ടീം രാവിലെ മുതൽ വൈകിട്ട് വരെ ഓവുങ്കൽ കടവിൽ പരിശോധന നടത്തിയിരുന്നു. എന്നാൽ ഒന്നും കണ്ടെത്താനായില്ല. ഇതിനിടയിൽ എൽദോസിൻ്റെ ചെരുപ്പ് ചെട്ടിപ്പിള്ളി എന്ന ഭാഗത്ത് നിന്ന് പോലീസിന് ലഭിച്ചു.വസ്ത്രവും മൊബൈൽ ഫോണും ഓവുങ്കൽ കടവിൽ നിന്ന് കണ്ടെത്തിയിരുന്നു.കൂടെയുണ്ടായിരുന്ന വാച്ചർ രാജനെ പോലീസ് ചോദ്യം ചെയ്ത് വരികയാണ്. സംഭവത്തിൽ ദുരൂഹത ഉണ്ടെന്നാണ് ബന്ധുക്കൾ പറയുന്നത്.
