കോതമംഗലം: കാലാവധി കഴിഞ്ഞ് അപകടാവസ്ഥയില് നില്ക്കുന്ന മുല്ലപ്പെരിയാർ അണക്കെട്ട് ഡീ കമ്മീഷൻ ചെയ്യണമെന്നും കേരളത്തിന് ദോഷകരമായ കരാർ റദ്ദാക്കണമെന്നും ആവശ്യപ്പെട്ട് സമര സമിതി രൂപീകരിക്കാൻ മുല്ലപ്പെരിയാർ ജനസംരക്ഷണ സമിതി തീരുമാനിച്ചു.സമരങ്ങളെക്കുറിച്ചും നിയമ നടപടികളെകുറിച്ചും ആലോചിക്കുവാൻ സംസ്ഥാനതല ജനകീയ കണ്വൻഷൻ നാളെ ഉച്ചകഴിഞ്ഞ് രണ്ടിന് തൊടുപുഴ പൊതുമരാമത്ത് റസ്റ്റ് ഹൗസില് ചേരും. റോയ് വാരികാട്ട് അധ്യക്ഷത വഹിക്കുന്ന കണ്വൻഷൻ മലങ്കര ഓർത്തഡോക്സ് മെത്രോപ്പൊലീത്ത തോമസ് മാർ അത്തനാസിയോസ് ഉദ്ഘാടനം ചെയ്യും.
സ്വാമി സദ് സ്വരൂപാനന്ദ സരസ്വതി, സ്വാമി അയ്യപ്പദാസ്, യൂസഫ് സഖാഫി, ഖാലിദ് സഖാഫി, ഫാ. ജോസ് പ്ലാന്തോട്ടം, ഫാ. ജോസ് മോനിപ്പളളി, മറ്റ് വിവിധ സംഘടനാ നേതാക്കള് എന്നിവർ പങ്കെടുക്കുമെന്ന് ചെയർമാൻ റോയ് വാരികാട്ട്, ജനറല് കണ്വീനർ പി.ടി. ശ്രീകുമാർ എന്നിവർ അറിയിച്ചു.
