കോതമംഗലം – കോതമംഗലം, വാരപ്പെട്ടിയിൽ നിയന്ത്രണം വിട്ട കാർ ചായക്കട തകർത്തു.നിർത്താതെ പോയ വാഹനത്തിൻ്റെ ഉടമയെ പോലീസ് തിരിച്ചറിഞ്ഞതായി സൂചന. ഇന്നലെ അർദ്ധരാത്രിയാണ് നിയന്ത്രണം വിട്ട കാർ വൈദ്യുതപോസ്റ്റ് തകർത്ത് കടയിലേക്ക് പാഞ്ഞ് കയറിയത്. ആളുകൾ എത്തിത്തുടങ്ങിയപ്പോഴേക്കും കാർ വാഴക്കുളം ഭാഗത്തേക്ക് ഓടിച്ചു പോവുകയായിരുന്നു. പ്രദേശവാസിയായ സുമ എന്ന സ്ത്രീയുടെ ഉടമസ്ഥതയിലുള്ള കടയാണിത്. ഭർത്താവ്‌ മരിച്ചു പോയ ഈ വീട്ടമ്മയുടെ ഏക വരുമാനമാർഗമായിരുന്നു ഇത്. 15 വർഷത്തോളം നടത്തിയ കട അസുഖബാധിതയായതിനെ തുടർന്ന് രണ്ട് വർഷമായി വാടകക്ക് നൽകിയിരിക്കുകയാണ്. കടയുടെ ഭിത്തിയും ഉപകരണങ്ങളും പൂർണമായി നശിച്ചിട്ടുണ്ട്. വൈദ്യുതി തൂൺ വട്ടം ഒടിഞ്ഞു. സമീപത്തെ മറ്റൊരു വീടിൻ്റെ മതിലിനും കേടുപാടുകൾ സംഭവിച്ചിട്ടുണ്ട്. പോലീസ് രാത്രി തന്നെ സ്ഥലത്തെത്തി നടപടികൾ സ്വീകരിച്ചിട്ടുണ്ട്. രോഗിയായ തൻ്റെ ഏക വരുമാനമാർഗമാണ് ഈ കടയെന്നും നഷ്ടപരിഹാരം ഉടൻ ലഭ്യമാക്കണമെന്നും കടയുട സുമ പറഞ്ഞു. അപകടമുണ്ടാക്കിയവരെ ഉടൻ കണ്ടെത്തണമെന്നും നഷ്ടപരിഹാരം നൽകി കടപുനസ്ഥാപിക്കുന്നതിനുള്ള നടപടി സ്വീകരിക്കണമെന്നും വാർഡ് മെമ്പർ ശ്രീകല പറഞ്ഞു.
