കോതമംഗലം: ചെങ്കര കല്ലാനിക്കപ്പടിയിൽ ഓട്ടത്തിനിടെ കെ.എസ്.ആർ.ടി.സി. ബസിൽനിന്ന് കണ്ടക്ടർ തെറിച്ചുവീണു പരിക്ക്. പരിക്കേറ്റ കോതമംഗലം കെ. എസ്. ആർ. ടി. സി ഡിപ്പോയിലെ കണ്ടക്ടർ റഷീദിനെ കോതമംഗലം താലൂക്ക് ആശുപത്രിയിൽ പ്രവേശിപ്പിച്ചു. വ്യാഴാഴ്ച വൈകീട്ട് ആണ് സംഭവം. കോതമംഗലത്തുനിന്ന് വടാട്ടുപാറയ്ക്കുള്ള ബസ് ചെങ്കരക്ക് സമീപം കല്ലാനിക്കൽപ്പടിയിൽ എത്തിയപ്പോൾ റഷീദ് വാതിലിലൂടെ തെറിച്ചുവീഴുകയായിരുന്നു. വൈകിട്ടത്തെ ട്രിപ്പായതിനാൽ വിദ്യാർഥികൾ ഉൾപ്പെടെ സാമാന്യം തിരക്കും ഉണ്ടായിരുന്നു.
യാത്രക്കാർക്ക് ടിക്കറ്റ് നൽകി കൊണ്ടിരിക്കുന്നതിനി ടെയാണ് അപകടം. വാതിൽ അടച്ചിരുന്നതാണെന്ന് പറ യുന്നു. വീഴ്ചയുടെ ആഘാതത്തിൽ വാതിൽ തുറന്ന് പുറത്തേക്ക് പോയതാണെന്നാണ് വിവരം. ഓടിക്കൂടിയ നാട്ടുകാർ കണ്ടക്ടറെ കാറിൽ കീരംപാറയിലെ ക്ലിനിക്കിൽ എത്തിച്ച് പ്രാഥമിക ചികിത്സ നൽകി താലൂക്ക് ആശുപ ത്രിയിൽ എത്തിക്കുകയായിരുന്നു. ഡ്രൈവർ യാത്രക്കാരെ വടാട്ടുപാറയിൽ എത്തിച്ച് മടങ്ങുകയും ചെയ്തു. പരിക്ക് സാരമുള്ളതല്ലെന്ന് അധികൃതർ പറഞ്ഞു.
