കോതമംഗലം : കവളങ്ങാട് മലമുകളിൽ കയറിയ മൂവർസംഘത്തിലെ ഒരാളെ മരിച്ചനിലയിൽ കണ്ടെത്തി. നേര്യമംഗലം നീണ്ടപാറ ഡബിൾകുരിശ് മീമ്പാട്ട് ജെറിനാണ് (21) മരിച്ചത്. കഴിഞ്ഞ ശനിയാഴ്ച്ച രാത്രിയിൽ കവളങ്ങാടിന് സമീപം കൊട്ടാരം മുടി ( പീച്ചാട്ട് മല)യിലേക്ക് രണ്ട് സുഹൃത്തുക്കൾക്കൊപ്പം ജെറിൻ മല കയറുകയായിരുന്നു. മുകളിലെത്തി മൂവരും മലമുകളിൽ കിടന്നുറങ്ങുകയായിരുന്നു. പുലർച്ചെ മൂന്നരയോടെ ജെറിന് ദേഹാസ്വാസ്ഥ്യമുണ്ടായതിനെ തുടർന്ന് സുഹൃത്തുക്കൾ ഊന്നുകൽ പൊലീസിൽ വിവരം അറിയിക്കുകയായിരുന്നു. ഉടൻ പൊലീസെത്തി മലയിൽ കയറി യുവാവിനെ കോതമംഗലത്തെ സ്വകാര്യ ആശുപത്രിയിൽ പ്രവേശിപ്പിച്ചു.
പരിശോധനയിൽ മരിച്ചതായി സ്ഥിരീകരിച്ചു. കൂടെയുണ്ടായിരുന്നവരെ പോലീസ് ചോദ്യം ചെയ്ത് വിട്ടയച്ചു. ജെറിൻ നേര്യമംഗലം പെട്രോൾപമ്പിലെ ജീവനക്കാരനാണ്. പ്രാഥമിക നിയമ നടപടികൾക്ക് ശേഷം യുവാവിന്റെ സംസ്‌കാരം നടത്തി. ഹൃദയ വാൽവിന് ജന്മനാ ഉണ്ടായ തകരാൻ ആണ് മരണകാരണമെന്ന് പോസ്റ്റ്മാർട്ടത്തിലെ റിപ്പോർട്ടിനെ അടിസ്ഥാനപ്പെടുത്തി പോലീസ് വെളിപ്പെടുത്തുന്നു.
