വന്യ മൃഗശല്യം പരിഹരിക്കണമെന്ന് ആവശ്യപ്പെട്ട് ആന്റണി ജോൺ എംഎൽഎ നിയമസഭയിൽ.

കോതമംഗലം: കോതമംഗലം മണ്ഡലത്തിൽ വിവിധ പ്രദേശങ്ങളിൽ കാട്ടാനകൾ അടക്കമുള്ള വന്യ മൃഗശല്യത്തിന് പരിഹാരം കാണുന്നതിനു വേണ്ട നടപടി സ്വീകരിക്കണമെന്ന് ആന്റണി ജോൺ എംഎൽഎ നിയമസഭയിൽ ആവശ്യപ്പെട്ടു. ജനവാസ മേഖലകളിൽ ഉൾപ്പെടെ കാട്ടാനകൾ അടക്കമുള്ള വന്യ മൃഗങ്ങൾ ഇറങ്ങി വ്യാപകമായ കൃഷിനാശമടക്കമുള്ള നാശ നഷ്ടങ്ങൾ ഉണ്ടാക്കുന്നതായും, ഈ പ്രശ്നങ്ങൾക്ക് ശാശ്വത പരിഹാരം കണ്ടെത്തുന്നതിനു വേണ്ടി പ്രസ്തുത പ്രദേശങ്ങളിൽ റെയിൽ ഫെൻസിങ്ങും,ട്രഞ്ചും അടക്കമുള്ള ആധുനിക പ്രതിരോധ മാർഗ്ഗങ്ങൾ സ്വീകരിക്കുവാൻ വേണ്ട നടപടി കൈക്കൊള്ളണമെന്നും എംഎൽഎ നിയമ സഭയിൽ ആവശ്യപ്പെട്ടു.

അതുപോലെ വന്യമൃഗശല്യം മൂലം ഉണ്ടാകുന്ന കൃഷി നാശത്തിന് കർഷകർക്ക് നഷ്ട പരിഹാരം ലഭ്യമാകുന്നതിനു വേണ്ട നടപടി വേഗത്തിലാക്കണമെന്നും എംഎൽഎ ആവശ്യപ്പെട്ടു.കോതമംഗലം മണ്ഡലത്തിലെ കോതമംഗലം ഡിവിഷനിലെ തട്ടേക്കാട് സെക്ഷനിൽ ചേലമല ഭാഗത്തും,പുന്നേക്കാട് ഭാഗത്തും അടുത്ത കാലത്ത് കാട്ടാന ശല്യം റിപ്പോർട്ട് ചെയ്തിട്ടുണ്ടെന്നും ചേലമല ഭാഗത്ത് ഒരു കിലോമീറ്റർ ദൂരം സോളാർ പവർ ഫെൻസിങ്ങ് ചെയ്യുന്നതിനു വേണ്ട നടപടികൾ സ്വീകരിച്ചു വരുന്നുണ്ടെന്നും ബഹു:വനം വകുപ്പ് മന്ത്രി അഡ്വ.കെ രാജു എംഎൽഎയെ അറിയിച്ചു.

വനമേഖലയോട് ചേർന്നുള്ള ജനവാസ മേഖലകളിൽ വന്യജീവി ആക്രമണം തടയുന്നതിനായി സൗരോർജ്ജ വേലികൾ നിർമ്മിച്ചു വരുന്നുണ്ടെന്നും കോട്ടപ്പടി, പിണ്ടിമന പഞ്ചായത്തുകളിലായി വാവേലി മുതൽ അയിനിച്ചാൽ വരെ 5.50 കി മീറ്ററും,വാവേലി മുതൽ കണ്ണക്കട വരെ 5.20 കി മീറ്ററും,കുട്ടമ്പുഴ പഞ്ചായത്തിൽ 57.40 കി മീറ്ററും നിലവിൽ സൗരോർജ്ജ വേലി ഉണ്ടെന്നും കൂടാതെ,പ്രസ്തുത പ്രദേശങ്ങളിൽ ജനവാസ മേഖലകളിൽ ഇറങ്ങുന്ന വന്യമൃഗങ്ങളെ തിരികെ കാട്ടിലേയ്ക്ക് കയറ്റി വിടുന്നതിനും മറ്റ് അടിയന്തിര സേവനം ലഭ്യമാക്കുന്നതിനുമായി സ്പെഷ്യൽ ഫോറസ്റ്റ് പ്രൊട്ടക്ഷൻ ഫോഴ്സിനെയും വനം വകുപ്പ് ജീവനക്കാരെയും താൽക്കാലിക വാച്ചർമാരെയും ഉൾപ്പെടുത്തി എലിഫന്റ് ഡിപ്രഡേഷൻ സ്ക്വാഡുകളെയും സജ്ജമാക്കിയിട്ടുണ്ടെന്നും,നിലവിൽ പ്രസ്തുത പ്രദേശങ്ങളിൽ ഫണ്ടിന്റെ ലഭ്യത അനുസരിച്ച് ഈ സാമ്പത്തിക വർഷത്തിൽ തന്നെ കോട്ടപ്പടി,കുട്ടമ്പുഴ പഞ്ചായത്തുകളിലായി സൗരോർജ്ജ വേലികൾ നിർമ്മിക്കുന്നതിനുള്ള നടപടികൾ പുരോഗമിച്ചു വരുന്നതായും ബഹു:മന്ത്രി പറഞ്ഞു.

കൃഷി നാശത്തിന് ആവശ്യമായ രേഖകൾ സഹിതം സമർപ്പിക്കുന്ന അപേക്ഷകളിൽ ഫണ്ടിന്റെ ലഭ്യതയനുസരിച്ച് നഷ്ടപരിഹാരം നൽകി വരുന്നതായും നിലവിൽ ഓൺലൈനായി ലഭിക്കുന്ന അപേക്ഷകളിന്മേൽ സമയബന്ധിതമായി തുടർ നടപടികൾ സ്വീകരിക്കുകയും ഫണ്ടിന്റെ ലഭ്യതയ്ക്കനുസരിച്ച് നഷ്ട പരിഹാരം നൽകുകയും ചെയ്തു വരുന്നതായും, 2018 – 19 ൽ 122 പേർക്കായി 1269285 രൂപയും,2019 – 20 ൽ 93 പേർക്കായി 1104059 രൂപയും നഷ്ട പരിഹാരം ലഭ്യമാക്കിയതായും ബഹു:മന്ത്രി ആന്റണി ജോൺ എംഎൽഎയെ നിയമ സഭയിൽ അറിയിച്ചു.