കീരംപാറ: കീരംപാറ ഗ്രാമപഞ്ചായത്തിൽ നടന്ന ഉപതെരഞ്ഞെടുപ്പിൽ യുഡിഫ് സ്ഥാനാർത്ഥി സാൻ്റി ജോസ് 41 വോട്ടിന്റെ ഭൂരിപക്ഷത്തിൽ വിജയിച്ചു. മുൻ മെമ്പറെ അയോഗ്യയാക്കിയതിനെ തുടർന്നാണ് ആറാം വാർഡിൽ ഉപതെരഞ്ഞെടുപ്പ് നടത്തേണ്ടി വന്നത്. ഇടതുപക്ഷം നിലവിൽ ഭരണം നടത്തുന്ന പഞ്ചായത്തിൽ ആറാം വാർഡിലെ ജയപരാജയങ്ങൾ പഞ്ചായത്ത് ഭരണത്തെ ബാധിക്കുമെന്നതിനാൽ വാശിയേറിയ തെരഞ്ഞെടുപ്പ് പ്രചാരണമാണ് സ്ഥാനാർത്ഥികളും മുന്നണികളും കാഴ്ചവച്ചത്.
13 അംഗ ഭരണസമിതിയിൽ എൽ ഡി എഫ് – 6, യു ഡി ഫ്- 6 എന്നിങ്ങനെയാണ് ഇപ്പോഴത്തെ കക്ഷി നില. ഈ വാർഡിൽ സ്വതന്ത്രയായി മത്സരിച്ച് ജയിച്ച അംഗത്തിൻ്റെ പിന്തുണയോടെ എൽ ഡി എഫ് പഞ്ചായത്ത് ഭരിക്കുമ്പോഴാണ് തെരഞ്ഞെടുപ്പ് കമ്മീഷൻ അംഗത്തെ അയോഗ്യയാക്കി ഉത്തരവിറക്കിയത്. യു ഡി ഫ് സ്ഥാനാർത്ഥി ജയിച്ചതോടുകൂടി ഏഴംഗങ്ങളുടെ പിന്തുണയോടെ അവർക്ക് പഞ്ചായത്ത് ഭരണം പിടിച്ചെടുക്കാനാവും. അഞ്ച് സ്ഥാനാർത്ഥികളാണ് മത്സര രംഗത്തുണ്ടായിരുന്നത്. സാൻ്റി ജോസ് (UDF-252), റാണി റോയി ( LDF-211), രഞ്ജു രവി (NDA-5 ), സുവർണ സന്തോഷ് (ആം ആദ്മി പാർട്ടി-96 ), റാണി ജോഷി (സ്വത-2 ) എന്നിങ്ങനെയാണ് സ്ഥാനാർത്ഥികൾക്ക് ലഭിച്ച വോട്ടുകൾ.
