നാടിനെ ദോഷകരമായി ബാധിച്ചിരിക്കുന്ന ടാർ മിക്സിങ് യൂണിറ്റ് അടച്ചുപൂട്ടണം : കെ.സി.വൈ.എം കോതമംഗലം രൂപത

കവളങ്ങാട്: പുലിയൻപാറ ഗ്രാമത്തിന്റെ ശാന്തതയെയും സൗന്ദര്യത്തെയും ഹനിക്കുന്ന ടാർ മിക്സിങ് യൂണിറ്റിന്റെ പ്രവർത്തനം നിർത്തലാക്കണമെന്ന് കെ.സി.വൈ.എം കോതമംഗലം രൂപത. മിക്സിങ് യൂണിറ്റിൽ നിന്നും ഉയരുന്ന പുകയും ദുർഗന്ധവും വലിയ ശബ്ദവും നാടിന്റെ സൗന്ദര്യത്തെയും സമാധാനത്തെയും ദോഷകരമായി ബാധിച്ചിരിക്കുന്നു. പുലയൻപാറ കത്തോലിക്കാ ദേവാലയത്തിന് 38 മീറ്റർ അകലെ പ്രവർത്തിക്കുന്ന ഈ മിക്സിങ് യൂണിറ്റ് അവിടുത്തെ തിരുക്കർമ്മങ്ങൾ നടത്തുവാൻ തടസ്സമാവുകയും, അയൽവീടുകളിൽ താമസിക്കുന്ന പ്രായമായവരുടെയും കുട്ടികളുടെയും വിവിധ ആരോഗ്യ പ്രശ്നങ്ങൾക്ക് കാരണമാവുകയും ചെയ്യുന്നു. നാടിനെ ദോഷകരമായി ബാധിക്കുന്ന ഇത്തരം മിക്സിങ് യൂണിറ്റുകൾക്ക് തദ്ദേശ സ്വയംഭരണ സ്ഥാപനങ്ങൾ എന്ത് മാനദണ്ഡത്തിൽ ആണ് അനുമതി നൽകിയതെന്നും, അഗ്നിശമനസേന പോലുള്ളവയുടെ സേഫ്റ്റി സർട്ടിഫിക്കറ്റ് ലഭിച്ചതിനുശേഷമാണോ യൂണിറ്റിന്റ പ്രവർത്തനം നടക്കുന്നത് എന്നും ഇവയ്ക്കെതിരെ കർശനമായ അന്വേഷണം വേണമെന്നും കെ.സി.വൈ.എം ആവശ്യപ്പെട്ടു.

ബഹു. കോടതിയിൽ നിന്നും സ്റ്റോപ്പ് മെമ്മോ ലഭിച്ചപ്പോഴും ‘ഇതിലും ഇരട്ടി ശക്തിയോടെ ഞങ്ങൾ തിരിച്ചു വരും’ എന്ന് ധാർഷ്ട്യമാണ് മിക്സിങ് യൂണിറ്റ് മാനേജ്മെന്റിനുള്ളത്. ഇത്തരം വലിയ കുത്തകകളോട് മത്സരിക്കുവാൻ ഗ്രാമത്തിലെ ജനങ്ങൾക്ക് ആവതില്ല. സമൂഹ നന്മ ലക്ഷ്യംവച്ചുള്ള രാഷ്ട്രീയ പ്രവർത്തനങ്ങൾക്ക് മങ്ങൽ സംഭവിച്ചു എന്നുള്ളതിന്റെ ഉത്തമ ഉദാഹരണമാണ് പുലിയൻപാറ ഗ്രാമത്തിൽ ഇപ്പോൾ നടന്നുകൊണ്ടിരിക്കുന്നത്. ജനവാസ മേഖലയിൽ നിന്നും ടാർ മിക്സിങ് പ്ലാന്റ് മാറ്റി സ്ഥാപിക്കണമെന്നും, നാടിന്റെ നഷ്ടപ്പെട്ട സമാധാനവും സൗന്ദര്യവും വീണ്ടെടുക്കാൻ ജനപ്രതിനിധികളും ഉദ്യോഗസ്ഥ നിരയും മുൻകൈ എടുക്കണമെന്നും കെ.സി.വൈ.എം ഓർമപ്പെടുത്തി. മനുഷ്യന്റെ ജീവനും സ്വത്തിനും സുരക്ഷിതത്വം നൽകേണ്ട സർക്കാരും സർക്കാർ സ്ഥാപനങ്ങളും അവൻ മറന്ന ഒരു വ്യക്തിക്കോ അവരുടെ വളർച്ചയ്ക്ക് വേണ്ടി സമൂഹത്തിന്റെ ആവശ്യങ്ങൾ കണ്ടില്ലെന്നു നടിക്കരുത്. തിരഞ്ഞെടുപ്പുകാലത്ത് സൗഹൃദം നടിച്ച് മുതലെടുപ്പിനായി എത്തുന്ന ‘കുറുക്കന്മാരെ’ ജനങ്ങൾ തിരിച്ചറിയുകയും അത്തരക്കാരെ അകറ്റിനിർത്തി നാടിന്റെ നന്മക്കായി ഒന്നിച്ച് മുന്നേറുകയും വേണം.

നാടിന്റെ ദുരവസ്ഥ മനസ്സിലാക്കി പ്ലാന്റ് പ്രവർത്തനനങ്ങളിൽ നിന്നും മാനേജ്മെന്റ് സ്വമേധയാ പിന്മാറണമെന്നും, വീണ്ടും നാടിനും നാട്ടുകാർക്കും ശല്യമായ രീതിയിൽ പ്രവർത്തനം നടത്തിയാൽ പ്രത്യക്ഷ സമരവുമായി മുന്നോട്ടുപോകുമെന്നും കെ.സി.വൈ.എം അറിയിച്ചു. രൂപത പ്രസിഡന്റ് ജിബിൻ ജോർജ് തന്നിക്കാമറ്റത്തിൽ അധ്യക്ഷത വഹിച്ചു. രൂപത ഡയറക്ടർ ഫാ. സിറിയക് ഞാളൂർ, രൂപത ആനിമേറ്റർ സി. റെനിറ്റ് FCC, രൂപത ജനറൽ സെക്രട്ടറി ജോർബിൻ ബേബി എന്നിവർ പ്രസംഗിച്ചു. രൂപത ഭാരവാഹികളായ മാത്യു പോൾ, ബിബിന ജോർജ്, ഡോണ ബേബി, ജോയ്‌സി പി ജോൺ, നോബിൾ വർഗീസ്, ജോൺ കുര്യാക്കോസ്, സിറിൾ ജോസഫ്, ഫിയോണ ബെന്നി,സെബിൻ ആന്റണി, അനു ഫ്രാൻസിസ്, മഞ്ജിമ ജോർജ്, റോജിൻ മാത്യു എന്നിവർ പങ്കെടുത്തു.