കോതമംഗലം: കനത്ത മഴയില്‍ കോട്ടപ്പടി നാഗഞ്ചേരിയില്‍ കിണര്‍ ഇടിഞ്ഞ് താഴ്ന്നു. നാഗഞ്ചേരി എന്‍എസ്എസ് കരയോഗത്തിന് സമീപം പ്ലാക്കോട്ടില്‍ ലേഖ ജയകുമാറിന്റെ വീടിന് സമീപത്തെ കിണറാണ് ഇടിഞ്ഞുവീണത്. വര്‍ഷങ്ങളുടെ പഴക്കമുള്ള കിണറിന്റെ മുകള്‍വശവും ചുറ്റും കെട്ടിയതുമടക്കമാണ് ഇടിഞ്ഞ് താഴ്ന്നത്. വ്യാഴാഴ്ച അര്‍ധരാത്രിക്ക് ശേഷമാണ് കിണര്‍ തകര്‍ന്നതെന്ന് വീട്ടുകാര്‍ പറഞ്ഞു. ഇന്നലെ രാവിലെയാണ് അറിയുന്നത്. മുപ്പതടിയോളം താഴ്ചയുള്ള കിണറില്‍ സാമാന്യം വെള്ളം ഉണ്ടായിരുന്നു. കിണറിന്റെ പകുതിയിലേറെ ഭാഗം മണ്ണുമൂടിയ നിലയിലാണ്. കിണര്‍ നശിച്ചതോടെ വീട്ടുകാരുടെ കുടിവെള്ളവും മുട്ടിയിരിക്കുകയാണ്. വില്ലേജ് അധികൃതര്‍ സ്ഥലത്തെത്തി പരിശോധിച്ചു.
