കോതമംഗലം: കീരംപാറ പഞ്ചായത്തിലൈ പുന്നേക്കാട് കാട്ടാനക്കുട്ടം നിരവധി കര്ഷകരുടെ കൃഷി നശിപ്പിച്ചു. പുന്നേക്കാട് കളപ്പാറ മേഖലയില് വെള്ളിയാഴ്ച രാത്രി 8.45ഓടെയാണ് കാട്ടാനക്കൂട്ടമെത്തിയത്. കൃഷി നശിപ്പിച്ച ശേഷം ചിന്നംവിളിച്ച് പ്രദേശവാസികളെ ഭീതിയിലാഴ്ത്തിയ ആനകള് ഇന്നലെ രാവിലെ 6.30ഓടെയാണ് കാടുകയറിയത്. പുത്തേത്ത് ഏലിയാസ്, കവുങ്ങുംപിള്ളി എല്ദോസ്, കക്കാട്ടുകുടി മോളി തോമസ്, പ്ലാങ്കുടി സജി, പനിച്ചിക്കുടി ജോബി എന്നിവര് ഓണവിപണി ലക്ഷ്യമിട്ട് കൃഷിചെയ്ത വാഴകളും, തെങ്ങ്, കമുക് എന്നിവയുമാണ് നശിപ്പിച്ചത്.
കാട്ടാനകള് എത്തിയ വിവരം വനം വകുപ്പ് അധികൃതരെ അറിയിച്ചിട്ടും ഒരു രാത്രി മുഴുവന് ഉദ്യോഗസ്ഥരോ, ആര്ആര്ടിയോ എത്തിയില്ലെന്ന് നാട്ടുകാര് ആരോപിച്ചു. ദിവസവേതനക്കാരായ രണ്ട് ഫോറസ്റ്റ് വാച്ചര്മാര് മാത്രമാണ് അവിടെ എത്തിയത്. ഇവരും പ്രദേശവാസികളും ചേര്ന്ന് രാത്രി മുഴുവന് കാട്ടാനയെ തുരത്താന് ശ്രമം നടത്തിയെങ്കിലും രാവിലെയാണ് ആനക്കൂട്ടം കാട്ടിലേക്ക് പോയത്. കാട്ടാന ശല്യത്തിന് ശാശ്വത പരിഹാരം വേണമെന്ന് കര്ഷക കോണ്ഗ്രസ് സംസ്ഥാന ജനറല് സെക്രട്ടറി പി.സി. ജോര്ജ്, നിയോജക മണ്ഡലം പ്രസിഡന്റ് ജയിംസ് കോറബേല് എന്നിവര് ആവശ്യപ്പെട്ടു.
