കോതമംഗലം: വെറ്റിലപ്പാറ ദശലക്ഷം നഗറില് വാസയോഗ്യമല്ലാതെ അപകടഭീഷണിയിലായ മൂന്നു വീടുകള് പൊളിച്ചുനീക്കി. കഴിഞ്ഞ വെള്ളിയാഴ്ച പുലര്ച്ചെ നഗറിലെ പുത്തന്പുരയ്ക്കല് കൃഷ്ണന്കുട്ടി-അമ്മിണി ദന്പതികളുടെ വീട് തകര്ന്നിരുന്നു. വീട്ടിലുണ്ടായിരുന്നവര് പരിക്കുകളോടെ രക്ഷപ്പടുകയായിരുന്നു. ഞായറാഴ്ച വെട്ടുകാട്ടില് ശോശാക്കുട്ടി ഡാനിയേലിന്റെ വീടിന്റെ പിന്ഭിത്തിയും തകര്ന്നുവീണിരുന്നു. നഗറിലെ പത്തു വീടുകള് അപകടാവസ്ഥയിലായെന്ന് വ്യക്തമായതിനെ തുടര്ന്നാണ് പഞ്ചായത്ത് അടിയന്തര ഇടപെടല് നടത്തിയത്. പഞ്ചായത്ത് അധികാരികള് ഉടമസ്ഥരുടെ സമ്മതത്തോടെയാണ് അപകടാവസ്ഥിയിലായ മൂന്നു വീടുകള് ഇന്നലെ പൊളിച്ചുനീക്കിയത്.
പുന്നയ്ക്കല് ശാന്ത, വെട്ടുകാട്ടില് ശോശാക്കുട്ടി, മനയത്തുകുടി രമണി വിജയന് എന്നിവരുടെ വീടുകളാണ് പൊളിച്ചത്. നനഞ്ഞു കുതിര്ന്ന വെട്ടുകല്ല് ഭിത്തിയും ചോര്ന്നൊലിക്കുന്ന കോണ്ക്രീറ്റ് മേല്ക്കൂരയും അടക്കം ഈ വീടുകളെല്ലാം ഏതു നിമിഷവും നിലംപതിക്കാവുന്ന അവസ്ഥയിലായിരുന്നു. വീടു തകര്ന്നു വീണ കൃഷ്ണന്കുട്ടിയുടെ അടക്കം നാലു കുടുംബങ്ങള്ക്കാണ് പുതിയ ഭവനം ഒരുക്കേണ്ടത്. വീട് വാസയോഗ്യമല്ലാതായതോടെ പലരും നഗറിലെ താമസം മാറ്റിയിരുന്നു. രണ്ടും മൂന്നും സെന്റില് 450 ചതുരശ്രയടി വിസ്തീര്ണത്തിലുള്ള വീട്ടില് ഒരു മുറിയും അടുക്കളയും ശൗചാലയവും മാത്രമാണുള്ളത്. ചരിവ് ഭൂമിയില് വേണ്ടവിധത്തില് അടിത്തറ പോലുമില്ലാതെ 30 വര്ഷം മുന്പ് കെട്ടിപ്പൊക്കിയ 30 വീടുകളാണ് ഇവിടെയുള്ളത്. താമസയോഗ്യമല്ലാത്ത അഞ്ചു വീടുകളിലെ കുടുംബങ്ങള് നഗറിലെ എസ്സി കമ്യൂണിറ്റി ഹാളിലേക്ക് താമസം മാറ്റിയിരുന്നു.
