കോതമംഗലം : സെൻട്രൽ റോഡ് ഇൻഫ്രാസ്ട്രക്ച്ചർ ഫണ്ട് സ്കീമിൽ ഉൾപ്പെടുത്തി ഇടുക്കി പാർലമെൻറ് മണ്ഡലത്തിലെ 25.7 നീളം വരുന്ന 2 റോഡുകൾക്കായി 35 കോടി രൂപ അനുവദിച്ചതായി ഡീൻ കുര്യാക്കോസ് എംപി അറിയിച്ചു. തങ്കളം –തൃക്കാരിയൂർ-ആയക്കാട്-മുത്തംകുഴി-വേട്ടാംപാറ (12 കിമി.) റോഡിന് 16 കോടി രൂപയാണ് കേന്ദ്ര ഉപരിതല ഗതാഗത മന്ത്രാലയം അനുമതി നൽകിയിരിക്കുന്നത്. 17ാം ലോക് സഭാ കാലയളവിൽ സി ആർ ഐ എഫ് -ആദ്യമായാണ് കേരളത്തിലേക്ക് റോഡ് അനുവദിക്കുന്നതെന്ന് എം.പി. പറഞ്ഞു.
2020 ൽ ഇതുസംബന്ധിച്ച് റോഡുകളുടെ പട്ടിക സംസ്ഥാന ദേശിയപാതാ വിഭാഗത്തിന് എം.പി. നൽകിയിരുന്നു. എന്നാൽ സംസ്ഥാനത്തുനിന്നും നൽകുവാൻ തയ്യാറാക്കിയിരുന്ന പട്ടികയിൽ ഇടുക്കി പാർലമെൻറ് മണ്ഡലത്തിലെ റോഡുകൾ ഉൾപ്പെട്ടിരുന്നില്ല. ഇക്കാര്യം കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്ഗരിയെയും റോഡ് വിഭാഗം ഡയറക്ടർ ജനറലിനെയും ശ്രദ്ധയിൽകൊണ്ടുവരികയും തുടർന്ന് പൊതുമരാമത്ത് ദേശീയപാത വിഭാഗം ചീഫ് എൻജിനീയർ, വകുപ്പ് സെക്രട്ടറി എന്നിവരുമായി ബന്ധപ്പെട്ട് റോഡുകളുടെ പട്ടിക വീണ്ടും കേന്ദ്രത്തിന് അയക്കുകയും ചെയ്തതിൻറെ അടിസ്ഥാനത്തിലാണ് ഇപ്പോൾ രണ്ട് റോഡുകൾക്ക് അനുമതി ലഭിച്ചിരിക്കുന്നത്.
ഇടുക്കി ജില്ലയിലെ നെടുങ്കണ്ടം-പച്ചടി-മഞ്ഞപ്പാറ-മേലെചിന്നാർ റോഡ് 13.7 കി.മി. ദൂരം റോഡിന് 19 കോടിയുമാണ് ഇതോടൊപ്പം അനുവദിച്ചിരിക്കുന്ന രണ്ടാമത്തെ റോഡ്. റോഡുകൾ ആധുനിക സംവിധാനത്തിൽ ബി എം ബി സി നിലവാരത്തിൽ കേന്ദ്ര ഉപരിതലഗതാഗത മന്ത്രാലതത്തിൻറെ കീഴിൽ പൊതുമരാമത്ത് ദേശിയപാതാ വിഭാഗമാണ് റോഡ് നിർമ്മാണത്തിന് മേൽനോട്ടം വഹിക്കുന്നത്. കൂടുതൽ റോഡുകൾ പദ്ധതിയിൽ ഉൾപ്പെടുത്തുന്നതിന് ശ്രമിച്ചുവരുന്നതായി എം.പി. അറിയിച്ചു.
