കോതമംഗലം : വർദ്ധിച്ചുവരുന്ന മദ്യം മയക്കുമരുന്ന് ലഹരി വ്യാപനം, തൊഴിലില്ലായ്മ, കൃഷി ബഫർ സോൺ പ്രശ്നങ്ങൾ, ദളിത് ക്രൈസ്തവ പ്രശ്നങ്ങൾ, തീരദേശ മത്സ്യത്തൊഴിലാളി പ്രശ്നങ്ങൾ എന്നിവയ്ക്ക് ശാശ്വത പരിഹാരം ആവശ്യപ്പെട്ടുകൊണ്ട് ഇരുപതോളം ക്രൈസ്തവ സംഘടനകളുടെ കൂട്ടായ്മയായ UCF (യുണൈറ്റഡ് ക്രിസ്ത്യൻ ഫോറം) കാസർഗോഡ് മുതൽ തിരുവനന്തപുരം വരെ നടത്തുന്ന ലോങ്ങ് മാർച്ചിന് കോതമംഗലത്ത് സ്വീകരണം നൽകി. കോതമംഗലം രൂപത വികാരി ജനറൽ പെരിയ ബഹു. ഫാ. ഫ്രാൻസിസ് കീരംപാറ സ്വീകരണ സമ്മേളനം ഉദ്ഘാടനം ചെയ്തു. കത്തീഡ്രൽ വികാരി ബഹു ഫാ തോമസ് ചെറുപറമ്പിൽ ലോങ്ങ് മാർച്ച് ക്യാപ്റ്റൻ അഡ്വക്കേറ്റ് ജസ്റ്റിൻ പള്ളിവാതുക്കലിനെ പൊന്നാടയണിച്ച് സ്വീകരിക്കുകയും ആശംസകൾ അർപ്പിക്കുകയും ചെയ്തു.

കോതമംഗലം രൂപത ഡിഎഫ്സി പ്രസിഡന്റ് ഡിഗോൾഡ്, എ കെ സി സി പ്രതിനിധി പ്രൊഫസർ ജോർജ് കുര്യാക്കോസ്, പിതൃവേദി പ്രസിഡന്റ് സോണി പമ്പയ്ക്കൽ, ജിജോ അറയ്ക്കൽ എന്നിവർ ആശംസകൾ നേർന്നു സംസാരിച്ചു. കേരളം ഇന്ന് അഭിമുഖീകരിച്ചു കൊണ്ടിരിക്കുന്ന ഈ പൊതു വിഷയങ്ങൾ ഉയർത്തിക്കൊണ്ടുള്ള ഈ ലോങ്ങ് മാർച്ചിന് ആവേശജനകമായ സ്വീകരണമാണ് കേരളീയ പൊതുസമൂഹത്തിൽ നിന്ന് ലഭിക്കുന്നത്. നവംബർ 23 ആം തീയതി കാസർഗോഡ് നിന്ന് ആരംഭിച്ച മാർച്ച് ഡിസംബർ പത്താം തീയതി തിരുവനന്തപുരത്ത് സമാപിക്കുന്നതാണ്. രാഷ്ട്രീയ നേതൃത്വംവും ഭരണകർത്താക്കളും ഈ വിഷയങ്ങൾ കണക്കിലെടുക്കണമെന്നും ശാശ്വതമായ പരിഹാര മാർഗ്ഗങ്ങൾ രൂപപ്പെടുത്തണമെന്നും ക്യാപ്റ്റൻ അഡ്വക്കേറ്റ് ജസ്റ്റിൻ പള്ളിവാതുക്കൽ ആവശ്യപ്പെട്ടു.

കത്തീഡ്രൽ പള്ളി അസിസ്റ്റന്റ് വികാരി ഫാദർ സിറിൽ വള്ളോംകുന്നേൽ സ്വീകരണ സമ്മേളനത്തിന് നന്ദി അർപ്പിച്ചു.കോതമംഗലം ഇടവകയിലെ കൈക്കാരന്മാർ, പാരിഷ് കൗൺസിൽ അംഗങ്ങൾ, പിതൃവേദി, എ കെ സി സി, ഡി എഫ് സി, മാതൃവേദി, ഭാരവാഹികളും പ്രതിനിധികളും സ്വീകരണ യോഗത്തിൽ പങ്കുചേർന്നു.

കോതമംഗലം: അറുപതിനായിരം കോടി ഡോളറിന്റെ സെമി കണ്ടക്ടര്‍ വ്യവസായത്തില്‍ വിപ്ലവകരമായ മാറ്റങ്ങള്‍ക്ക് ഇടയാക്കുന്ന ഗവേഷണങ്ങള്‍ പുരോഗമിക്കുന്നതായി മദ്രാസ് ഐ.ഐ.ടി. യിലെ പ്രൊഫ. ഡോ. ദിലീപ് ആര്‍ നായര്‍ അഭിപ്രായപ്പെട്ടു. മൈക്രോ ഇലക്‌ട്രോ മെക്കാനിക്കല്‍ സിസ്റ്റംസ് അടിസ്ഥാനമാക്കിയുള്ള ഓസിലേറ്ററുകള്‍ പരമ്പരാഗത രീതിയിലുള്ള ക്വാര്‍ട്‌സ് ക്രിസ്റ്റല്‍ ഓസിലേറ്ററുകളെ പിന്തള്ളുന്ന കാലം വിദൂരമല്ല. റേഡിയോ ഫ്രീക്വന്‍സി മൈക്രോ ഇലക്‌ട്രോ മെക്കാനിക്കല്‍ സിസ്റ്റംസ് ഓസിലേറ്ററുകളുടെ പ്രൊട്ടോടൈപ്പ് മോഡലുകളുടെ നിര്‍മ്മാണ വഴിയിലാണ് മദ്രാസ് ഐ.ഐ.ടി. യിലെ ഗവേഷണ സംഘമെന്നും അദ്ദേഹം വ്യക്തമാക്കി. ഇത്തരം ഓസിലേറ്ററുകളുടെ ഡിസൈന്‍, മോഡലിംഗ്, നിര്‍മ്മാണം, ടെസ്റ്റിംഗ് എന്നിവയുടെ വിവിധ പടവുകളെ കുറിച്ച് അദ്ദേഹം വിശദമായി ക്ലാസ്സെടുത്തു.

കോതമംഗലം മാര്‍ അത്തനേഷ്യസ് എഞ്ചിനീയറിംഗ് കോളേജിന്റെ വജ്രജൂബിലിയോടനുബന്ധിച്ച് നടക്കുന്ന ‘വജ്ര മേസ്’ സെമിനാറില്‍ സംസാരിക്കുകയായിരുന്നു അദ്ദേഹം. കോതമംഗലം മാര്‍ അത്തനേഷ്യസ് എഞ്ചിനീയറിംഗ് കോളേജിന്റെ വജ്രജൂബിലിയോടനുബന്ധിച്ച് നടക്കുന്ന ശാസ്ത്ര സാങ്കേതിക എക്‌സിബിഷന്‍ ‘വജ്ര മേസ്’ കാണുവാന്‍ ദിനം പ്രതി ആയിരങ്ങള്‍ ആണ് മാര്‍ അത്തനേഷ്യസ് എഞ്ചിനീയറിംഗ് കോളേജിലേക്കെത്തിച്ചേര്‍ന്നത്. അത്ഭുതവും ഒപ്പം ആകാംഷയും നിറഞ്ഞ മനസ്സുമായിട്ടാണ് നാടിന്റെ നാനാ ഭാഗങ്ങളില്‍ നിന്നെത്തിയ ജനങ്ങള്‍ ഈ പ്രദര്‍ശനങ്ങള്‍ കണ്ട് മടങ്ങുന്നത്. പ്രദർശനം നാളെ ശനിയാഴ്ച്ച സമാപിക്കും.

കോതമംഗലം : മാധ്യമ രംഗത്ത് കാൽനൂറ്റാണ്ട് പൂർത്തീകരിച്ച കോതമംഗലത്തെ മുതിർന്ന പത്രപ്രവർത്തകനായ ജോഷി അറക്കലിന് പുരോഗമന കലാസാഹിത്യ സംഘം പുരസ്‌കാരം നൽകി ആദരിച്ചു. 1996 നവംബർ 20 ന് കേരള ടൈംസിൻ്റെ കോതമംഗലം ലേഖകനായി തുടങ്ങി കേരള കൗമുദി , കലാ കൗമുദി തുടങ്ങിയ പത്രങ്ങളുടെ ലേഖകനായും ജോഷി അറക്കൽ പത്രപ്രവർത്തന മേഖലയിൽ വ്യക്തിമുദ്ര പതിപ്പിച്ചിട്ടുണ്ട്. കേരള ജേർണലിസ്റ്റ് യൂണിയൻ സംസ്ഥാന സെക്രട്ടറി ,ദേശാഭിമാനി കോതമംഗലം ലേഖകൻ , സി ഐ ടി യു കോതമംഗലം ഏരിയ ജോ. സെക്രട്ടറി , വ്യാപാരി വ്യവസായി സമിതി കോതമംഗലം ഏരിയ വൈസ് പ്രസിഡൻ്റ് ,സുവർണ രേഖ ജോ സെക്രട്ടറി തുടങ്ങിയ വിവിധ മേഖലകളിൽ നിലവിൽ പ്രവർത്തിച്ചു വരുന്നു. ഭാര്യ ലിൻസി, മക്കൾ ആൻ മരിയ, ബേസിൽ ജോഷി മാത്യു(ഇരുവരും വിദ്യാർത്ഥികൾ).