കോതമംഗലം : റോൾ ഫോഴ്സ് വൺ ക്ലബ്‌ സംഘടിപ്പിക്കുന്ന ഓൾ കേരള റോളർ സ്കേറ്റിംഗ് ടൂർണമെന്റിന്റെ റോഡ് മത്സരങ്ങൾ തങ്കളം നാലുവരി പാതയിൽ വച്ച് നടന്നു. ഫ്ലാഗ് ഓഫ് ആന്റണി ജോൺ എം എൽ എ നിർവ്വഹിച്ചു.സ്കേറ്റിംഗ് അസോസിയേഷൻ ജില്ലാ പ്രസിഡന്റ് മേരി ജോർജ് തോട്ടം യോഗത്തിൽ അധ്യക്ഷത വഹിച്ചു. കോതമംഗലം മുനിസിപ്പൽ ചെയർമാൻ കെ കെ ടോമി,സ്റ്റാന്റിംഗ് കമ്മിറ്റി ചെയർമാൻ കെ എ നൗഷാദ്,സ്കേറ്റിംഗ് അസോസിയേഷൻ അംഗങ്ങളായ സിയാദ് കെ എസ്,ലിമോൻ അശോക് തുടങ്ങിയവർ ചടങ്ങിൽ സംസാരിച്ചു.കേരളത്തിലെ പ്രധാനപെട്ട എല്ലാ സ്കേറ്റിംഗ് ക്ലബ്ബുകളിലെയും 500 ഓളം മത്സരാർത്ഥികൾ മാറ്റുരക്കുന്ന ടൂർണ്ണമെന്റ് മത്സരങ്ങൾ ഇന്ന് (28-01-2023) അവസാനിയ്ക്കും.

കുട്ടമ്പുഴ : ഭൂതത്താൻകെട്ട് ഇടമലയാർ 66 KV ടവർ ലൈനിലെ 1000 കിലോ അലുമിനിയം കമ്പികൾ മോഷണം ചെയ്ത കേസ്സിൽ 7 പേർ പിടിയിൽ. വടാട്ടുപ്പാറ,ചക്കിമേട് സ്വദേശികളായ, മനയത്ത് വീട്ടിൽ മാത്യു മകൻ ബിനു (44), കുന്നത്തറ വീട്ടിൽ വറുഗീസ് മകൻ മത്തായി (54) . കളരിക്കുടിയിൽ വീട്ടിൽ കുഞുമോൻ മകൻ സാബു (44), നമ്പിള്ളിൽ വീട്ടിൽ അനിൽ മകൻ ജ്യോതി കുമാർ (23) . പാറയിൽ വീട്ടിൽ കുട്ടപ്പൻ മകൻ ജിബി (48), ഇടയാൽ വീട്ടിൽ തങ്കപ്പൻ മകൻ മനോജ് (47),തങ്കളത്ത് ആക്രികട നടത്തുന്ന കൈതക്കാട്ടിൽ വീട്ടിൽ മീരാഫർ മകൻ ഷാജി (56) എന്നിവരെയാണ് മോഷണമുതലുമായി ഇൻസ്പെക്ടർ ഷൈനും, സഹപ്രവർത്തകരും ചേർന്ന് കുട്ടമ്പുഴ പോലീസ് അറസ്റ്റ് ചെയ്തത്.

2022 ഡിസംബർ 20 മുതൽ 2023 ജനുവരി 20 വരെയുള്ള കാലയളവിലാണ് പ്രതികൾ സംഘംചേർന്ന് നിർമ്മാണം നിറുത്തിവച്ചിരുന്ന ഭൂതത്താൻകെട്ട് ഇടമലയാർ 66 KV ടവർ ലൈനിലെ 1000 കിലോ അലുമിനിയം കമ്പികൾ മോഷണം ചെയ്ത് തങ്കളത്തെ ആക്രികടയിൽ വിൽപ്പന നടത്തിയത്. മോഷണ സംഘത്തിലെ അംഗങ്ങളെ അലത്തൂർ, എളമക്കര, മാലിപ്പാറ,വടാട്ടുപ്പാറ എന്നിവടങ്ങളിൽ നിന്ന് ഇൻസ്പെക്ടർ ഷൈന്റെ നേതൃത്വത്തിൽ S I മാരായ ജോർജ്ജ്,ലിബു,അജികുമാർ,ASI സുരേഷ്,SCPO ജോളി,നവാസ്, CPO സിദ്ദിക്ക്, അനുരാജ്,ജിതേഷ്,അഭിലാഷ്,വിനോയി,സിൽജു എന്നിവർ ചേർന്നുള്ള അന്വോഷണ സംഘം അറസ്റ്റ് ചെയ്തത്, കേസ് രജിസ്റ്റർ ചെയ്ത് 24 മണിക്കൂറിനുള്ളിൽ മോഷണ സംഘത്തിലെ എല്ലാ പ്രതികളേയും അറസ്റ്റ് ചെയ്യാനായത് കേരളാ പോലീസിന് അഭിമാനകരമായി. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

കോതമംഗലം : പുതുപ്പാടി ഫാദർ ജോസഫ് മെമ്മോറിയൽ ഹയർ സെക്കൻഡറി സ്കൂളിൽ ഹൈസ്കൂളിന്റെ പ്ലാറ്റിനം ജൂബിലിയുടെയും ഹയർ സെക്കൻഡറിയുടെ സിൽവർ ജൂബിലിയുടെയും ഔപചാരിക ഉദ്ഘാടനവും പ്ലാറ്റിനം ജൂബിലിയുടെ ഒരു വർഷം നീണ്ടു നിൽക്കുന്ന ആഘോഷ പരിപാടികളുടെ ലോഞ്ചിംഗ് പ്രോഗ്രാമായി,സഹപാഠിക്ക് എൻ എസ് എസ് യൂണിറ്റിന്റെ നേതൃത്വത്തിൽ നിർമ്മിച്ചു നൽകിയ വീടിന്റെ താക്കോൽധാനവും വിദ്യാഭ്യാസവകുപ്പ് മന്ത്രി വി ശിവൻകുട്ടി നിർവ്വഹിച്ചു. ആന്റണി ജോൺ എം എൽ എ അദ്ധ്യക്ഷത വഹിച്ച ചടങ്ങിൽ സ്കൂൾ മാനേജർ ഷെവ. പ്രസാദ് പി വർഗീസ് സ്വാഗതവും അഭിവന്ദ്യ ഏലിയാസ് മാർ അത്തനാസിയോസ് മെത്രാപ്പോലീത്ത അനുഗ്രഹ പ്രഭാഷണവും നടത്തി. പ്ലാറ്റിനം ജൂബിലി ലോഗോ പ്രകാശനം ഡോ.മാത്യു കുഴൽനാടൻ എം എൽ എ നിർവ്വഹിച്ചു.ദേശീയ അവാർഡ് ജേതാവും സ്കൂളിലെ ചിത്രകല അധ്യാപകനുമായ സജീഷ് പി എ,എൻ എസ് എസ് സംസ്ഥാന അവാർഡ് ജേതാക്കളായ അധ്യാപകൻ ഷെറിൽ ജേക്കബ്,ആൻമരിയ റെജി,വി എം മുഹസിൻ,സംസ്ഥാന സ്കൂൾ വെയ്റ്റ് ലിഫ്റ്റിംഗ് ചാമ്പ്യൻഷിപ്പിൽ വെള്ളി മെഡൽ നേടിയ ശിവ റ്റി എം എന്നിവർക്കുള്ള പുരസ്കാര വിതരണവും നടത്തി.25 വർഷത്തെ അധ്യാപന ജീവിതത്തിനു ശേഷം സർവീസിൽ നിന്നും വിരമിക്കുന്ന ഹയർ സെക്കൻഡറി അധ്യാപകൻ സാബു തോമസിനെ ചടങ്ങിൽ ആദരിച്ചു.സ്കൂൾ പ്രിൻസിപ്പൽ എ സുനിൽ,ഹെഡ്മിസ്ട്രസ് ജിഷ കെ ഈപ്പൻ റിപ്പോർട്ട് അവതരിപ്പിച്ചു.മുൻമന്ത്രി ടി യു കുരുവിള,മുനിസിപ്പൽ ചെയർമാൻ കെ കെ ടോമി,ജില്ലാ പഞ്ചായത്ത് മെമ്പർ ശാരദ മോഹൻ, എഫ് ഐ ടി ചെയർമാൻ ആർ അനിൽകുമാർ,മുൻ മുനിസിപ്പൽ ചെയർമാൻ സിജു എബ്രാഹം,ഡി ഇ ഓ പ്രീത രാമചന്ദ്രൻ,കെ എം അബ്ദുൾ മജീദ്,പ്രൊഫ. ഡോ. വിനോദ് ജേക്കബ്,മുഹമ്മദ് ഷാഫി,മറീന മാത്യു,ജീവൻ കെ എസ് എന്നിവർ ചടങ്ങിൽ പങ്കെടുത്തു.