കോതമംഗലം : കോതമംഗലം മണ്ഡലത്തിൽ കുട്ടമ്പുഴ പഞ്ചായത്തിലെ വിവിധ മേഖലകളിൽ ഇക്കോ ടൂറിസം പദ്ധതി നടപ്പിലാക്കുന്നത് സർക്കാരിന്റെ സജീവ പരിഗണനയിലാണെന്ന് ടൂറിസം വകുപ്പ് മന്ത്രി പി എ മുഹമ്മദ് റിയാസ് നിയമസഭയിൽ വ്യക്തമാക്കി. ഇത് സംബന്ധിച്ച് ആൻ്റണി ജോൺ എംഎൽഎ ഉന്നയിച്ച നിയമസഭ ചോദ്യത്തിന് മറുപടി പറയുമ്പോഴാണ് ടൂറിസം വകുപ്പ് മന്ത്രി ഇക്കാര്യം വ്യക്തമാക്കിയത്.
കോതമംഗലം മണ്ഡലത്തിലെ കുട്ടമ്പുഴ പഞ്ചായത്തിലെ വിവിധ പ്രദേശങ്ങളിൽ ഉൾപ്പെടുന്ന പിണ്ടിമേട് വെള്ളച്ചാട്ടം,ചാമിക്കുത്ത്,കൊടുംബിരി കുത്ത്,കണ്ടംപാറ,തട്ടേക്കാട് പക്ഷിസങ്കേതം,ക്ണാച്ചേരി,ഭരണിക്കുഴി,ആനക്കയം,ഇടമലയാർ, വൈശാലി ഗുഹ,കൊയ്നിപ്പാറ,കുഞ്ചിക്കുടി,ശൂലമുടി അടക്കമുള്ള സ്വാഭാവിക പ്രകൃതി രമണീയമായ നിരവധി പ്രദേശങ്ങളുണ്ട്. ഈ പ്രദേശങ്ങളിൽ ഇക്കോ ടൂറിസം പദ്ധതി നടപ്പിലാക്കുന്നതിനു വേണ്ട നടപടി സ്വീകരിക്കണമെന്ന് എംഎൽഎ നിയമസഭയിൽ ആവശ്യപ്പെട്ടു.
നിരവധി സൂപ്പർ ഹിറ്റ് സിനിമകളുടെ അടക്കം ലൊക്കേഷന് കൂടി വേദിയായ പ്രസ്തുത സ്ഥലങ്ങളിലേക്ക് സോഷ്യൽ മീഡിയ അടക്കമുള്ള മാധ്യമങ്ങളിൽ കൂടി അറിഞ്ഞ് നിരവധി വിനോദ സഞ്ചാരികൾ എത്തിച്ചേരുന്നുണ്ടെങ്കിലും വനം വകുപ്പ് വിവിധ പ്രദേശങ്ങളിൽ പ്രവേശനം നിരോധിച്ചിരിക്കുന്നത് മൂലവും,അടിസ്ഥാന സൗകര്യങ്ങൾ ഇല്ലാത്തതും,ഈ മേഖലകളിൽ ടൂറിസം പദ്ധതികൾ ഇല്ലാത്തതും മൂലം സഞ്ചാരികൾക്ക് ഈ പ്രദേശങ്ങളുടെ സ്വാഭാവിക ഭംഗി ആസ്വദിക്കുവാൻ കഴിയാത്തത് എംഎൽഎ സഭയുടെ ശ്രദ്ധയിൽപ്പെടുത്തി.ഇവിടെ ഇക്കോ ടൂറിസം പദ്ധതി നടപ്പിലാക്കിയാൽ പ്രദേശത്തിന്റെ വികസനത്തോടൊപ്പം പ്രദേശവാസികൾക്ക് തൊഴിൽ ല്യഭ്യതയും ഉറപ്പുവരുത്താനാകുമെന്നതിനാൽ മേൽ പ്രദേശങ്ങളിൽ ഇക്കോ ടൂറിസം പദ്ധതി നടപ്പിലാക്കുന്നതിനു വേണ്ട നടപടി സ്വീകരിക്കണമെന്നും എംഎൽഎ ആവശ്യപ്പെട്ടു.
ടി വിഷയത്തിൽ എംഎൽഎയുടെ അഭ്യർത്ഥന പ്രകാരം 2020 ഫെബ്രുവരി നാലിന് വിനോദ സഞ്ചാര വകുപ്പ് ഉദ്യോഗസ്ഥരും, പഞ്ചായത്ത് അധികൃതരും ചേർന്ന് നിർദ്ദിഷ്ട പദ്ധതി പ്രദേശങ്ങൾ സന്ദർശിക്കുകയും,മേഖലയിലെ വിനോദ സഞ്ചാര സാധ്യതകളെക്കുറിച്ച് ചർച്ച നടത്തുകയും ചെയ്തിരുന്നതായും, ഇക്കോ ടൂറിസം ഉൾപ്പെടെയുള്ള ടൂറിസം സാധ്യതകൾ വിശദമായി പരിശോധിച്ച ശേഷം വനം വകുപ്പുമായി കൂടി സഹകരിച്ച് തുടർ നടപടികൾ സ്വീകരിക്കുമെന്നും ടൂറിസം മന്ത്രി പി എ മുഹമ്മദ് റിയാസ് ആന്റണി ജോൺ എംഎൽഎയെ നിയമ സഭയിൽ അറിയിച്ചു.
