കോതമംഗലം: കസ്തൂരിരംഗൻ റിപ്പോർട്ടിന്റെ അടിസ്ഥാനത്തിൽ കുട്ടമ്പുഴ വില്ലേജ് പൂർണമായും പരിസ്ഥിതിലോല പ്രദേശമായി പ്രഖ്യാപിക്കാനുള്ള പട്ടികയിൽ ഉൾപ്പെടുത്തിയത് അത്യന്തം ആശങ്കാജനകമാണെന്ന് യുഡിഎഫ് എറണാകുളം ജില്ലാ കൺവീനർ ഷിബു തെക്കുംപുറം പറഞ്ഞു. കുട്ടമ്പുഴയിലെ വലിയ ജനവാസ മേഖലയും, കൃഷിഭൂമിയും ഈ പരിധിയിൽ വരുന്നതോടെ ദൈനംദിന ജീവിതം അതിസങ്കീർണമാകും. യുഡിഎഫ് സർക്കാർ നിയോഗിച്ച ഡോ. ഉമ്മൻ വി ഉമ്മൻ കമ്മിറ്റി നടത്തിയ പഠനത്തിന് ശേഷം സമർപ്പിച്ചിരുന്ന റിപ്പോർട്ടിൽ ഇഎസ്എ പരിധിയിൽ നിന്നും കുട്ടമ്പുഴയിലെ ജനവാസ മേഖലയും, കൃഷിഭൂമിയും പൂർണമായും ഒഴിവാക്കിയിരുന്നതാണ്. ഇപ്പോൾ കുട്ടമ്പുഴ പൂർണമായും പരിധിയിൽ പെട്ടത് ഒരു ഗൂഢാലോചനയുടെ ഫലമാണെന്നും ഷിബു തെക്കുംപുറം ആരോപിച്ചു. അതിന് ചുക്കാൻ പിടിച്ചത് മുൻ ഇടുക്കി എംപി ജോയ്‌സ് ജോർജ് ആയിരുന്നു.
കേരളത്തിൽ അതീവ പരിസ്ഥിതി ലോല പ്രദേശങ്ങളായി കണ്ടെത്തിയ 123 വില്ലേജുകളിൽ നിന്നും 31 എണ്ണം ഒഴിവാക്കിയപ്പോൾ അതിൽ 24 എണ്ണം ഇടുക്കി ജില്ലയിലും അതിൽ തന്നെ 18 എണ്ണം ഉടുമ്പൻചോല മണ്ഡലത്തിലുമാണ്. ഉടുമ്പൻചോല എംഎൽഎ എംഎം മണിയുമായി ജോയ്‌സ് ജോർജ് എംപി നടത്തിയ ഗൂഢാലോചനയുടെ ഫലമായിരുന്നു ഇത്. ആദ്യം ഒഴിവാക്കപ്പെട്ടിരുന്ന കുട്ടമ്പുഴ ലിസ്റ്റിൽ ഉൾപ്പെട്ടത് അദ്ദേഹത്തിന്റെ അറിവോടെ ആണ് എന്ന കാര്യത്തിൽ സംശയമില്ല. കോതമംഗലം എംഎൽഎയും ഇക്കാര്യത്തിൽ കുറ്റകരമായ നിഷ്‌ക്രിയത്വം കാണിച്ചു.
ആയിരക്കണക്കിന് കുടിയേറ്റ കർഷകരുടെ ജീവിതം വഴി മുട്ടിക്കുന്ന നടപടിക്ക് മുൻ എംപി ജോയ്‌സ് ജോര്ജും, ആന്റണി ജോൺ എംഎൽഎയും അടക്കം ബന്ധപ്പെട്ടവർ മറുപടി പറയണമെന്ന് ഷിബു തെക്കുംപുറം ആവശ്യപ്പെട്ടു. കേന്ദ്ര, സംസ്ഥാന സർക്കാരുകൾ വിഷയത്തിൽ അടിയന്തിരമായി ഇടപെടണമെന്നും അദ്ദേഹം അഭ്യർത്ഥിച്ചു. ആവശ്യം അംഗീകരിച്ചു കിട്ടുന്നത് വരെ ശക്തമായ പ്രക്ഷോഭവുമായി മുന്നോട്ടു പോകുമെന്നും അദ്ദേഹം വ്യക്തമാക്കി.
