കോട്ടപ്പടി : ഇന്നലെ രാവിലെ വടാശ്ശേരിയിൽ വച്ച് പൊട്ടിവീണ കേബിൾ സ്കൂട്ടറിൽ പോവുകയായിരുന്ന യുവാവിന്റെ കഴുത്തിൽ കുരുങ്ങി. കോട്ടപ്പടി പാറക്കൽ വീട്ടിൽ ഷമീർ പി.സിനാണ് മരണത്തെ മുഖാമുഖം കണ്ട ദുരവസ്ഥയുണ്ടായത്. ചെറുവട്ടൂരിലുള്ള സ്വന്തം സ്ഥാപനമായ ഭാരത് ഹാർഡ് വെയേസിലേക്ക് രാവിലെ സ്കൂട്ടറിൽ പോകുമ്പോൾ മുൻപിൽ പോയ ടോറസ് ലോറി റോഡിന് കുറുകെ വലിച്ച കേബിൾ ടെലിവിഷൻ ശൃംഖലയുടെ കേബിൾ പൊട്ടിക്കുകയും, സ്കൂട്ടറിൽ വരുകയായിരുന്ന ഷമീറിന്റെ കഴുത്തിൽ ചുറ്റുകയുമായിരുന്നു. മുൻപിൽ പോയ വാഹനത്തിൽ നിന്നും നിശ്ചിത ദൂരപരിധി പാലിച്ചതും, പെട്ടന്ന് സ്കൂട്ടർ ബ്രേക്ക് പിടിച്ചു നിർത്തുവാൻ സാധിച്ചതുകൊണ്ടും വലിയൊരു അപകടം ഒഴിവാകുകയായിരുന്നു. പെട്ടന്ന് തന്നെ ഷമീറിനെ ധർമ്മഗിരി ആശുപത്രിയിൽ പ്രവേശിപ്പിക്കുകയും പ്രാഥമിക ചികിത്സകൾ നൽകുകയും ചെയ്തു. കഴുത്തിലും കൈയ്യിലും കേബിൾ മുറുകി ഉണ്ടായ പരിക്കുകൾ ആരെയും ഭീതിപ്പെടുത്തുന്ന രീതിയിലുള്ളതാണ്.
ഭാരവാഹനങ്ങൾ, തടി ലോറികൾ, ക്രൈനുകൾ തുടങ്ങിയ വാഹനങ്ങൾ നിരന്തരം സഞ്ചരിക്കുന്ന തിരക്കുള്ള വഴിയിൽ നിശ്ചിത ഉയരം പാലിക്കാതെ റോഡിന് കുറുകെ വലിച്ചിരിക്കുന്ന കേബിൾ പൊട്ടിയാലുള്ള അപകടങ്ങൾ നാട്ടുകാർ ബന്ധപ്പെട്ടവരെ അറിയിച്ചിരുന്നെങ്കിലും അവഗണിക്കുകയായിരുന്നെന്നും, മനഃസാന്നിധ്യം കൊണ്ടുമാത്രം സ്കൂട്ടർ നിർത്തി അപകടത്തെ മറികടക്കുകയായിരുന്നു ഈ യുവാവെന്നും നാട്ടുകാർ പറയുന്നു. ഇനിയും അപകടങ്ങൾ ഉണ്ടാകാതെ കേബിൾ വലിച്ചിരിക്കുന്നവർ ശ്രദ്ധിക്കണമെന്നും നടപടികൾ അടിയന്തരമായി കൈകൊള്ളണമെന്നുമാണ് നാട്ടുകാർ ആവശ്യപ്പെടുന്നത്.
