കോതമംഗലം : ലൈബ്രറി കൗൺസിലിൻ്റെ ആഭിമുഖ്യത്തിൽ വായനാ പക്ഷാചരണത്തിൻ്റെ താലൂക്ക്തല ഉദ്ഘാടനം നടന്നു. കേരളത്തിലെ ഗ്രന്ഥശാലാ പ്രസ്ഥാനത്തിൻ്റെ ഉപജ്ഞാതാവ് പി എൻ പണിക്കരുടെ ചരമദിനമായ ജൂൺ 19 മുതൽ കേരള സ്റ്റേറ്റ് ലൈബ്രറി കൗൺസിലിന്റെ ആദ്യ സെക്രട്ടറിയായിരുന്ന ഐ വി ദാസിൻ്റെ ജന്മദിനമായ ജൂലൈ 7 വരെ യാണ് വായനാ പക്ഷാചരണമായി സംഘടിപ്പിക്കുന്നത്. ഇക്കാലയളവിൽ താലൂക്കിലെ വിവിധ ലൈബ്രറികളിൽ നിരവധി പരിപാടികൾ നടക്കും.
ചെറുവട്ടൂർ ഗവ. മോഡൽ ഹയർ സെക്കൻ്ററി സ്കൂളിൽ നടന്ന പരിപാടിയിൽ വച്ച് ആൻ്റണി ജോൺ എം എൽ എ ഉദ്ഘാടനം ചെയ്തു. ലൈബ്രറി കൗൺസിൽ പ്രസിഡൻ്റ് കെ ഒ കുര്യാക്കോസ് അധ്യക്ഷനായി. സംസ്ഥാന ലൈബ്രറി കൗൺസിൽ അംഗം സി പി മുഹമ്മദ്, സ്കൂൾ പ്രിൻസിപ്പാൾ നയന ദാസ് , അഡ്വ. സുരേഷ് എം കുമാർ, പി ടി എ പ്രസിഡൻ്റ് റംല ഇമ്പ്രാഹിം, പി ടി എ അംഗം കെ എ യൂസഫ് എന്നിവർ സംസാരിച്ചു. ലൈബ്രറി കൗൺസിൽ സെക്രട്ടറി മനോജ് നാരായണൻ സ്വാഗതവും ഇരമല്ലൂർ ലൈബ്രറി പ്രസിഡൻ്റ് എം എം കുഞ്ഞു മൈതീൻ നന്ദിയും പറഞ്ഞു. പരിപാടിക്ക് മുന്നോടിയായി കുട്ടികൾ കവിതാലാപനം നടത്തി.
