കോതമംഗലം: കോവിഡ് 19 ൻ്റെ പശ്ചാത്തലത്തിൽ വിദേശ രാജ്യങ്ങളിൽ നിന്നും മടങ്ങിയെത്തുന്ന പ്രവാസികൾക്ക് ക്വാറന്റയ്ൻ സൗകര്യം ഒരുക്കുന്നതിനായി കോതമംഗലം മണ്ഡലത്തിൽ 3 കോവിഡ് കെയർ സെൻ്ററുകൾ ഒരുങ്ങുന്നു. മാർ ബസോലിയസ് ദന്തൽ കോളേജ് നെല്ലിക്കുഴി 75 റൂമുകൾ (200ബെഡ്), ഇന്ദിരഗാന്ധി ദന്തൽ കോളേജ് നെല്ലിക്കുഴി 62 റൂമുകൾ (124 ബെഡ്), സെൻ്റ് ഗ്രിഗോറിയസ് ദന്തൽ കോളേജ് പിണ്ടിമന 54 റൂമുകൾ (108 ബെഡ്) എന്നിങ്ങനെ 3 കേന്ദ്രങ്ങളിലായി 191 റൂമുകളിലായി 432 ബെഡ്ഡുകൾ ഉള്ള കോവിഡ് കെയർ സെൻ്ററുകളാണ് പ്രവാസികൾക്കായി ഒരുങ്ങുന്നത്.
ഇവർക്ക് റൂമുകളിലേക്ക് ആവശ്യമായ ബെഡ്,പില്ലോ ബെഡ് ഷീറ്റ്,പുതപ്പ്,ബക്കറ്റ്,കപ്പ് അടക്കമുള്ള പ്രാഥമിക സൗകര്യങ്ങൾക്കായുളള്ള സാധന സാമഗ്രികൾ അതാത് സെൻ്ററുകളിൽ എത്തിച്ച് കൊണ്ടിരിക്കുകയാണ്. സെൻ്ററുകൾ ഒരുക്കുന്നതിന് മുന്നോടിയായി ഫയർ ആൻ്റ് റസ്ക്യൂ യൂണിറ്റിൻ്റെയും,യുവജന വോളണ്ടിയർമാരുടേയും നേതൃത്വത്തിൽ ശുചീകരണ പ്രവർത്തനങ്ങൾ നടന്നുവരികയാണ്.ഇവരുടെ ഭക്ഷണത്തിൻ്റേയും കോവിഡ് കെയർ സെൻ്ററുകളുടെ ക്ലീനിങ്ങ് അടക്കമുള്ള കാര്യങ്ങളുടേയും ചുമതല അതാത് പഞ്ചായത്ത് സെക്രട്ടറിമാർക്കാണ്.
ഡെപ്യൂട്ടി തഹസിൽദാർമാരെ ഓരോ കേന്ദ്രങ്ങളുടേയും നോഡൽ ഓഫീസറർമാരായി നിയമിച്ചിട്ടുണ്ട്.ആന്റണി ജോൺ എംഎൽഎ,തഹസിൽദാർ റേച്ചൽ കെ വർഗ്ഗീസ് എന്നിവരുടെ നേതൃത്വത്തിൽ മൂന്ന് കേന്ദ്രങ്ങളിലും കോവിഡ് കെയർ സെൻ്റർ ഒരുക്കുന്ന പ്രവർത്തനങ്ങൾ വേഗത്തിൽ പുരോഗമിച്ച് വരികയാണ്.
