കോതമംഗലം: രാജ്യത്തെ മികച്ച വിദ്യാഭ്യാസ സ്ഥാപനങ്ങളുടെ റാങ്കിങ്ങ് പ്രഖ്യാപിച്ചപ്പോൾ കോതമംഗലം മാർ അത്തനേഷ്യസ് (ഓട്ടോണോമസ് ) കോളേജിന് പൊൻതിളക്കം.കേന്ദ്ര വിദ്യാഭ്യാസ മന്ത്രാലയത്തിന്റെ വിദ്യാഭ്യാസ റാങ്കിങിൽ (നാഷണൽ ഇൻസ്റ്റിറ്റൂഷനൽ റാങ്കിങ് ഫ്രെയിം വർക്ക്- എൻ.ഐ. ആർ.എഫ്.) രാജ്യ ത്തെ മികച്ച 56-ാമത്തെ കോളേജ് ആയി കോതമംഗലം മാർ അത്തനേഷ്യസ് തെരഞ്ഞെടുക്കപ്പെട്ടു. 2021ൽ 86 -മത്തെ റാങ്ക് കരസ്ഥമാക്കിയ കോളേജ് ഒരു വർഷം കൊണ്ട് 56 മത്തെ റാങ്കിൽ എത്തി തിളക്കമാർന്ന നേട്ടം കൈവരിച്ചു . ഇന്ത്യയിലെ 42000 ത്തിൽ പരം കോളജുകളിൽ നിന്നാണ് ആദ്യ 100 ൽ ഇടം നേടി മാർ അത്തനേഷ്യസ് ഈ തിളക്കമാർന്ന നേട്ടം കൈവരിച്ചത്. ഗവേഷണം, മറ്റ് അക്കാഡമിക് പ്രവർത്തനങ്ങൾ, കലാ, കായികം, വിദ്യാർഥികൾക്ക് നൽകുന്ന പ്രോത്സാഹനങ്ങൾ, പഠന സൗകര്യങ്ങൾ എന്നിവയെല്ലാം എം.എ. കോളജിന് ആദ്യ 100 ൽ ഇടംപിടിക്കാൻ സഹായകമായി. 16 ബിരുദാനന്തര ബിരുദ പ്രോഗ്രാമുകളും 13 ബിരുദ പ്രോഗ്രാമുകളും 2 യു.ജി.സി. അംഗീകാര ബി വോക് പ്രോഗ്രാമും, ഒരു 5 വർഷ ഇന്റഗ്രേറ്റഡ് ബയോളജി കോഴ്സും, 4 ഗവേഷണ പ്രോഗ്രാമുകളും കോളജിൽ ഉണ്ട്.നാക് എ പ്ലസ് ഗ്രേഡ് കോളേജ് ആണ്.
കേന്ദ്ര വിദ്യാഭ്യാസ മന്ത്രലയത്തിന്റെ കീഴിലുള്ള മഹാത്മാഗാന്ധി നാഷണൽ കൗൺസിൽ ഓഫ് റൂറൽ എഡ്യൂക്കേഷൻ, സ്വച്ഛതാ ആക്ഷൻ പ്ലാൻ എന്നിവർ ഏർപ്പെടുത്തിയ പ്രഥമ ഡിസ്ട്രിക്ട് ഗ്രീൻ ചാമ്പ്യൻ അവാർഡ് ഉൾപ്പെടെയുള്ള നിരവധി പുരസ്കാരങ്ങൾ ഈ സ്വയം ഭരണ കോളജിനെ തേടിയെത്തിയിട്ടുണ്ട്.കായിക മേഖലക്ക് നിരവധി ദേശീയ, അന്തർ ദേശീയ താരങ്ങളെ സംഭാവന ചെയ്യാനും ഈ കോളേജിന് കഴിഞ്ഞിട്ടുണ്ട്.ഒളിമ്പ്യൻ അനിൽഡ തോമസും, ടി. ഗോപിയും , കാല്പന്ത് കളിയിലെ ദേശീയ താരങ്ങളായ മഷൂർ ഷെരിഫ് ടി, അലക്സ്‌ സജി ഇവർക്ക് പുറമെ ഈ മാസം ആരംഭിക്കുന്ന കോമൺ വെൽത്ത് ഗെയിംസിലും, ലോക ചാമ്പ്യൻഷിപ്പിലും പങ്കെടുക്കുന്ന മുഹമ്മദ്‌അജ്മൽ, എൽദോസ് പോൾ,അബ്ദുള്ള അബൂബക്കർ എന്നിവരും എം. എ. കോളേജിന്റെ കായിക കളരിയിൽ നിന്ന് ലോക കായിക ഭൂപട ട്രാക്കിലേക്ക് ഉദിച്ചുയർന്ന നക്ഷത്രങ്ങളാണ്.അധ്യാപ കരും അനധ്യാപകരും വിദ്യാർഥികളുമുൾപ്പെടെ എല്ലാവരും ഒന്നിച്ചു നടത്തിയ കൂട്ടായ പരിശ്രമങ്ങളുടെ ഫലമാണ് ഈ നേട്ടമെന്ന് കോളെജ് അസോസിയേഷൻ സെക്രട്ടറി ഡോ. വിന്നി വർഗീസ് പറഞ്ഞു.
