കോതമംഗലം :- കോതമംഗലം കെ എസ് ആർ ടി സി ഡിപ്പോയിൽ ഓൺലൈൻ റിസർവേഷൻ സൗകര്യം ആരംഭിച്ചു. ഉദ്ഘാടനം ആന്റണി ജോൺ എം എൽ എ നിർവ്വഹിച്ചു. ദീർഘദൂര ബസുകളിൽ ടിക്കറ്റുകൾ മുൻകൂട്ടി ബുക്ക് ചെയ്യുന്നതിനു വേണ്ടി ഈ സേവനം പ്രയോജനപ്പെടുത്താവുന്നതാണ്. ഇതിനുവേണ്ടി കോതമംഗലം കെ എസ് ആർ ടി സി ഡിപ്പോയിൽ ടിക്കറ്റ് ആൻഡ് ക്യാഷ് കൗണ്ടറിൽ സമീപിച്ചാൽ ടിക്കറ്റുകൾ മുൻകൂട്ടി ബുക്ക് ചെയ്യാവുന്നതാണ്. നിലവിൽ ജില്ലാ കേന്ദ്രങ്ങളിൽ മാത്രം ഉണ്ടായിരുന്ന റിസർവേഷൻ സൗകര്യം ആണ് കോതമംഗലത്ത് ഇപ്പോൾ ആരംഭിച്ചിട്ടുള്ളത്.
എ റ്റി ഓ അഭിലാഷ് പി എ അധ്യക്ഷത വഹിച്ച ചടങ്ങിൽ കുട്ടമ്പുഴ പഞ്ചായത്ത് പ്രസിഡന്റ് കാന്തി വെള്ളക്കയ്യൻ,പിണ്ടിമന പഞ്ചായത്ത് പ്രസിഡന്റ് ജെസ്സി സാജു,മുനിസിപ്പൽ കൗൺസിലർ കെ എ നൗഷാദ്,കെ എസ് ആർ ടി സി സി ഐ റ്റി യു സെക്രട്ടറി സിദ്ധിഖ് സി എം,ട്രാൻസ്പോർട്ട് വർക്കേഴ്സ് യൂണിയൻ ഐ എൻ റ്റി യു സി ശ്രീകുമാർ എന്നിവർ സന്നിഹിതരായിരുന്നു.ചടങ്ങിൽ സീനിയർ ക്ലർക്ക് പ്രീറ്റ്സി പോളിനെ എം എൽ എ ആദരിച്ചു.ജനറൽ കൺട്രോളിംഗ് ഇൻസ്പെക്ടർ അനസ് ഇബ്രാഹിം സ്വാഗതവും ചാർജ്മാൻ സീമോൻ എ ഡി നന്ദിയും പറഞ്ഞു.
