കോതമംഗലം: സംസ്ഥാന ബാംബൂ കോര്പ്പറേഷന് കോഴിപ്പിള്ളിയില് നിര്മിക്കുന്ന തൊഴില് നൈപുണ്യ കേന്ദ്രത്തിന്റെ (ഇന്കുബുലേഷന് സെന്റര്) ശിലാസ്ഥാപനം മന്ത്രി പി രാജീവ് ഓണ്ലൈനില് നിര്വഹിച്ചു. തൊഴില് നൈപുണ്യ പരിശീലനം നേടിയവര്ക്കുള്ള ടൂള്കിറ്റ് വിതരണം നഗരസഭ ചെയര്മാന് കെ.കെ. ടോമി നിര്വഹിച്ചു. ആന്റണി ജോണ് എം.എല്.എ. അധ്യക്ഷനായി. ബാംബൂ കോര്പ്പറേഷന് മാനേജിംഗ് ഡയറക്ടര് എം.എം. അബ്ദുള് റഷീദ്, ഡോ. ജോയ് എം. പോള്, കെ.ജെ. ജേക്കബ്ബ്, ടി.പി. ദേവസിക്കുട്ടി, സി.വി. ശശി എന്നിവര് പ്രസംഗിച്ചു.
ഒരു കോടി രൂപ ചിലവിൽ മൂന്നുനിലകളിലായി 3000ചതുരശ്ര അടിയില് നിര്മിക്കുന്ന കെട്ടിടത്തില് ബാംബൂ കോര്പ്പറേഷന് ഓഫീസ്, ഷോറൂം, തൊഴില് നൈപുണ്യകേന്ദ്രം, ട്രെയിനിംഗ് സെന്റര് എന്നിവ പ്രവര്ത്തിക്കും.
ബാംബൂ മേഖലയില് തൊഴിലെടുക്കുന്ന പരമ്പരാഗത ഈറ്റ വെട്ട്, പനമ്പ് നെയ്ത്ത് തൊഴിലാളികളുടെ ക്ഷേമത്തിനായി 1971 ല് സ്ഥാപിതമായതാണ് കേരള സംസ്ഥാന ബാംബൂ കോര്പ്പറേഷന്. കോര്പ്പറേഷന്റെ വികസനത്തിന് ആവശ്യമായി കഴിഞ്ഞ സര്ക്കാരിന്റെ കാലഘട്ടത്തില് 2018-19 ല് സംസ്ഥാന ബംബൂ മിഷന് വഴി നാഷണല് ബാംബൂ മിഷന് 11 പ്രോജക്ടുകള് സമര്പ്പിക്കുകയുണ്ടായി. ഈ മേഖലയിലെ കോര്പ്പറേഷന്റെ പ്രവര്ത്തനങ്ങള് വിലയിരുത്തി നാഷണല് ബാംബൂ മിഷന് 11 പ്രോജക്ടുകളും അംഗീകരിക്കുകയും ഉണ്ടായി. ഇതിന്റെ ഭാഗമായി ഇപ്പോള് തന്നെ കുമരകത്ത് ഒരു ബാംബൂ ഷോറൂമും, നാദാപുരത്ത് ചന്ദനത്തിരി സ്റ്റിക്കും ഉണ്ടാക്കുന്ന പദ്ധതി, 3 യന്ത്രവല്കൃത പനമ്പ് നെയ്ത്ത് കേന്ദ്രങ്ങള് മുതലായവ കഴിഞ്ഞ സര്ക്കാരിന്റെ കാലഘട്ടത്തില് ഉദ്ഘാടനം ചെയ്തു കഴിഞ്ഞിട്ടുള്ളതാണ്.
സര്ക്കാരില് നിന്നും ഇതിനു ആവശ്യമായ തുക ലഭിച്ചുവരുന്നേയുള്ളു. ഇതിന്റെ ഭാഗമായി കേരളത്തില് 588 ഹെക്ടര് സ്ഥലത്ത് മുള വച്ചുപിടിപ്പിക്കാനും കോതമംഗലത്തും, കോഴിക്കോടും ബാംബൂ തൊഴില് നൈപുണ്യകേന്ദ്രങ്ങള് സ്ഥാപിക്കാനും, മൂന്നാറിലും, മാനന്തവാടിയിലും , തേക്കടിയിലും ബാംബൂ ഷോറൂമുകള് നിര്മ്മിക്കുവാനുള്ള പദ്ധതിയും പുരോഗമിച്ചുവരുകയാണ്. ഇതില് കോതമംഗലത്ത് ബാംബൂ ഇന് കുബുലേഷന് സെന്റര് (തൊഴില് നൈപുണ്യ കേന്ദ്രം) ശിലാസ്ഥാപനം 2021 ആഗസ്റ്റ് 17-ം തീയതി ഉച്ചയ്ക്ക് 2.30 മണിയ്ക്ക് ബഹുമാനപ്പെട്ട വ്യവസായ, നിയമ വകുപ്പ് മന്ത്രി ശ്രീ.പി രാജീവ് ഓണ്ലൈനിലൂടെ നിര്വ്വഹിച്ചത്.
കോതമംഗലത്ത് ഈ തൊഴില് നൈപുണ്യ കേന്ദ്രം ബാംബൂ കോര്പ്പറേഷന്റെ ഉടമസ്ഥതയിലുള്ള സ്ഥലത്താണ് നിര്മ്മിക്കുന്നത്. 3 നിലകളിലായി നിര്മ്മിക്കുന്ന ഈ കോര്പ്പറേഷന്റെ വിസ്തൃതി 3000 സ്ക്വയര് ഫീറ്റാണ്. ഇതില് താഴത്തെ നിലയില് ബാംബൂ കോര്പ്പറേഷന്റെ ഓഫീസും, ഷോറൂമും, ഒന്നാമത്തെ നിലയില് തൊഴില് നൈപുണ്യ കേന്ദ്രവും, രണ്ടാമത്തെ നിലയില് ട്രയിനിംഗ് കൊടുക്കുന്ന ആള്ക്കാരെ താമസിപ്പിക്കുന്നതിനുള്ള സൗകര്യവുമാണ് ഈ പദ്ധതി കൊണ്ട് ചെയ്യാന് ഉദ്ദേശിക്കുന്നത്. ഇതു കൂടാതെ ഈ പദ്ധതി മൂലം ഇടുക്കി ജില്ലയിലെ ബാംബൂ മേഖലയില് പണിയെടുക്കുന്ന പരമ്പരാഗത ഈറ്റ വെട്ട്, പനമ്പ് നെയ്ത്ത് തൊഴിലാളികള്ക്ക് അവരുടെ ജീവനോപാധികള് നിര്മ്മിക്കുന്നതിനാവശ്യമായ പരിശീലനം നല്കാന് കഴിയും. ഒരു കോടിയാണ് ഈ പദ്ധതി വിഹിതം. അതില് 60% കേന്ദ്ര ഗവണമെന്റിന്റെയും, 40% കേരള ഗവണ്മെന്റിന്റെയും വിഹിതമാണ്. ഇതു മൂലം ബാംബൂ മേഖലയിലെ തൊഴിലാളികള്ക്ക് കൂടുതല് തൊഴില് അവസരങ്ങള് സൃഷ്ടിക്കാന് കഴിയുമെന്ന് പ്രതീക്ഷിക്കുന്നു.
മൂന്നാര് ടൂറിസ്റ്റ് കേന്ദ്രത്തിന്റെ കവാടമായ കോതമംഗലത്ത് നമ്മള് ഇതിലൂടെ നിര്മ്മിക്കുന്ന ബാംബൂ ബസാറിലൂടെ ഈ ഉല്പന്നങ്ങള്ക്ക് വിനോദസഞ്ചാരികളുടെ ശ്രദ്ധ ആകര്ഷിക്കാന് കഴിയുമെന്നും വിവിധ രാജ്യങ്ങളിലേയ്ക്ക് ബാംബൂ ഉല്പന്നങ്ങള് കയറ്റുമതി ചെയ്യുവാനുള്ള അവസരവും തുറക്കപ്പെടുകയാണ്. നാളിതുവരെ കഴിഞ്ഞ സര്ക്കാരിന്റെ കാലത്ത് ഈ മേഖലയിലെ തൊഴിലാളികള്ക്ക് വേണ്ടി പട്ടികജാതി വകുപ്പിന്റെ ഭാഗമായി ബാംബൂ കോര്പ്പറേഷന് തൊഴില് നൈപുണ്യപരിശീലനം നല്കുകയുണ്ടായി. വിജയകരമായിരുന്ന ഈ പ്രവര്ത്തനത്തിന്റെ സര്ട്ടിഫിക്കറ്റും , ടൂള് കിറ്റും ഈ അവസരത്തില് ബഹുമാനപ്പെട്ട എം.പി ശ്രീ.ഡീന് കുര്യാക്കോസ് നിര്വ്വഹിക്കുന്നതാണ്. ഇതിന്റെ തുടര്ച്ചയായി ഇനിയും തൊഴില് നൈപുണ്യ പരിശീലനങ്ങള് ബാംബൂ കോര്പ്പറേഷന്റെ കോതമംഗലത്തുള്ള തൊഴില് നൈപുണ്യകേന്ദ്രം വഴി നല്കാന് കഴിയുമെന്ന് പ്രതീക്ഷിക്കുന്നു.
വിനോദ സഞ്ചാര മേഖലയില് ബാംബൂ ഉപയോഗിച്ച് ധാരാളം പരിസ്ഥിതി സൗഹാര്ദ്ദ നിര്മ്മിതികള് ഇന്ഡ്യയിലുടനീളം നടന്നുവരുന്നുണ്ട്. ഈ നിര്മ്മാണ പ്രക്രിയയില് ബാംബൂ കോര്പ്പറേഷന് പല നിര്മ്മിതികളും നിര്മ്മിച്ച് ഫോറസ്റ്റ് ഡിപ്പാര്ട്ടുമെന്റിനും, വിനോദ സഞ്ചാര വകുപ്പിനും നല്കാന് കഴിഞ്ഞിട്ടുണ്ട്. ഇതുമായി ബന്ധപ്പെട്ട് കൂടുതല് ഗവേഷണങ്ങള് ചെയ്യേണ്ടത് അത്യാവശ്യമാണ്. ബാംബൂ മേഖലയില് ധാരാളം സ്റ്റാര്ട്ടപ്പുകള് കേരളത്തിലുടനീളം തുടങ്ങുവാനും, ഗവേഷണത്തിന് കോതമംഗലത്ത് വര്ഷങ്ങളായി ധാരാളം വിദഗ്ധരായ എഞ്ചിനീയര്മാരെയും , സാങ്കേതിക വിദഗ്ധരെയും സൃഷ്ടിച്ച എം.എ കോളേജ് ഓഫ് എഞ്ചിനീയറിംഗിന്റെ സിവില് ഡിപ്പാര്ട്ട്മെന്റുമായി ഈ അവസരത്തില് ധാരണാപത്രം ഒപ്പുവയ്ക്കുന്നതിന് ബാംബൂ കോര്പ്പറേഷന് മാനേജിംഗ് ഡയറക്ടര് ശ്രി.എ.എം അബ്ദുള് റഷീദ് , എം.എ കോളേജ് ഓഫ് സിവില് ഡിപ്പാര്ട്ട്മെന്റ് ഹെഡായ ഡോ.ജോയ്.എം.പോള് ഉം ചേര്ന്ന് നിര്വ്വഹിക്കുന്നു.
