കോതമംഗലം : കോതമംഗലം മണ്ഡലത്തിലെ കവളങ്ങാട്, പല്ലാരിമംഗലം,വാരപ്പെട്ടി പഞ്ചായത്തുകളിലേയും കോതമംഗലം മുൻസിപ്പാലിറ്റിയിലും വേനൽ കാലത്ത് ഉണ്ടാകുന്ന കുടിവെള്ള പ്രശ്നങ്ങൾക്കും, കടുത്ത വരൾച്ചയ്ക്കും,ശാശ്വത പരിഹാരം കാണുന്നതിന് വേണ്ടി ആവിഷ്കരിച്ചിട്ടുള്ള ആവോലിച്ചാൽ ലിഫ്റ്റ് ഇറിഗേഷൻ പദ്ധതിക്ക് 10.7 കോടി രൂപയുടെ അംഗീകാരമായി. ആവോലിച്ചാലിൽ പുതിയ പമ്പ്ഹൗസ് സ്ഥാപിച്ച് പെരിയാറിൽനിന്നും 800 മീറ്റർ ദൂരത്തിൽ പൈപ്പ് ലൈൻ വഴി വെള്ളം ലിഫ്റ്റ് ചെയ്തു പേരക്കുത്ത് തോട്ടിലേക്ക് ചാടിച്ച് തുടർന്ന് വെള്ളാമകുത്ത് തോട് വഴി 9 കിലോമീറ്റർ ദൂരത്തിൽ വെള്ളം ഒഴുക്കി പരീക്കണ്ണി ഭാഗത്ത് കോതമംഗലം പുഴയിലേക്ക് വെള്ളമെത്തിച്ചാണ് പദ്ധതി നടപ്പിലാക്കുന്നത്.
പദ്ധതി നടപ്പിലാക്കുന്നതോടെ വാട്ടർ അതോറിറ്റിയുടെ കോഴിപ്പിള്ളിയിലുള്ള പ്രധാന പമ്പ് ഹൗസ് ഉൾപ്പെടെ വിവിധ കുടിവെള്ള പദ്ധതികളുമായി ബന്ധപ്പെട്ട് വേനൽക്കാലത്ത് ഉൾപ്പെടെ മുഴുവൻ സമയവും സുലഭമായി വെള്ളം പമ്പ് ചെയ്യുവാനുള്ള സാഹചര്യം രൂപപ്പെടും.അതോടൊപ്പം പേരക്കുത്ത്,വെള്ളാമകുത്ത് തോടുകളായി 9 കിലോമീറ്റർ ദൂരത്തിൽ എട്ടോളം ചെക്ക് ഡാമുകൾ നിലവിലുണ്ട്.പദ്ധതിയുടെ ഭാഗമായി ഈ ചെക്ക് ഡാമുകളും നവീകരിക്കുന്നതോടെ പ്രസ്തുത തോടുകളായി 9 കിലോമീറ്റർ ദൂരത്തിൽ കടുത്ത വേനലിലും വെള്ളം നിറഞ്ഞു നിൽക്കുന്ന സാഹചര്യമുണ്ടാകും.ഇത് കവളങ്ങാട്,പല്ലാരിമംഗലം, വാരപ്പെട്ടി എന്നീ പഞ്ചായത്തുകളിലെയും,കോതമംഗലം മുനിസിപ്പാലിറ്റിയിലെയും കുടിവെള്ളക്ഷാമം പരിഹരിക്കുന്നതോടൊപ്പം തന്നെ കൃഷിക്കും,ജലസേചനത്തിനും ഉപയോഗപ്രദമാകുന്നതുമാണ്.
പദ്ധതി നടപ്പിലാക്കുന്നതിന്റെ പുരോഗതിയുമായി ബന്ധപ്പെട്ട് ജലവിഭവ വകുപ്പ് മന്ത്രി റോഷി അഗസ്റ്റിന്റെ അധ്യക്ഷതയിൽ തിരുവനന്തപുരത്ത് അവലോകന യോഗം ചേർന്നു. ആന്റണി ജോൺ എം എൽ എ,മുൻ എം എൽ എ എം വി മാണി,കവളങ്ങാട് പഞ്ചായത്ത് പ്രസിഡന്റ് ഷൈജന്റ് ചാക്കോ,ജലസേചന വകുപ്പ് ഉന്നത ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.പദ്ധതിയുടെ ഭാഗമായി പമ്പ് ഹൗസ് 24,44,189.95,സക്ഷൻ ആൻഡ് ഡെലിവറി പൈപ്പ് ലൈൻ 38,00,621.05,ചെക്ക് ഡാം മെയിൻ്റനൻസ് 2,94,62,514.96,സപ്ലൈ ആൻഡ് ലെയിങ്ങ് ഓഫ്പമ്പ്,സ്റ്റാർട്ടർ,വാക്കം പമ്പ്,സെക്ഷൻ ആൻഡ് ഡെലിവറി പൈപ്പ് 4,65,00000.00,ഇലക്ട്രിഫിക്കേഷൻ ചാർജ് ഇജ്ജ് 1,00,00000,കെ എസ് ഇ ബി ചാർജ് 4,00000,പി ഡബ്ല്യു ഡി റോഡ് കട്ടിങ്ങ് ചാർജ് 25,00000,മറ്റ് ചാർജുകൾ 4,25,000,ജി എസ് ടി അടക്കം 10.70 കോടി രൂപയുടെ പദ്ധതിയാണ് നടപ്പിലാക്കുന്നത്.
രണ്ട് നദികളെ തമ്മിൽ ബന്ധിപ്പിച്ചുള്ള ഈ മാതൃക പദ്ധതി നടപ്പിലാവുന്നതോടെ പ്രസ്തുത മേഖലകളിലെ കുടിവെള്ള ക്ഷാമത്തിനും,വേനൽ കാലത്തുണ്ടാകുന്ന വരൾച്ചയ്ക്കും ശാശ്വത പരിഹാരമാകുമെന്ന് ആന്റണി ജോൺ എം എൽ എ പറഞ്ഞു.
