കോതമംഗലം : കോതമംഗലം താലൂക്ക്‌ ആശുപത്രിയില്‍ ഓണ്‍ലൈന്‍ ഒ പി ചീട്ട് ബുക്കിംഗ്‌ (ഇ-ഹെൽത്ത്‌ പദ്ധതി ) ആരംഭിക്കുന്നതിന്റെ ഭാഗമായി ഇ – ഹെൽത്ത്‌ കാർഡ് പൊതുജനങ്ങള്‍ക്ക്‌ നല്‍കുന്നതിന്‍റെ ഉദ്ഘാടനം ആന്‍റണി ജോണ്‍ എം എല്‍ എ നിര്‍വ്വഹിച്ചു. നഗരസഭാ ചെയര്‍മാന്‍ കെ.കെ. ടോമി അദ്ധ്യക്ഷത വഹിച്ചു .ചടങ്ങില്‍ കോതമംഗലം നഗരസഭാ ആരോഗ്യ സ്റ്റാന്‍റിംഗ്‌ കമ്മിറ്റി ചെയര്‍മാന്‍ കെ.വി. തോമസ്‌, ഇന്‍ഡ്യന്‍ ബാങ്ക്‌ കോതമംഗലം ബ്രാഞ്ച്‌ മാനേജര്‍ അനിത എം.എസ്‌, ആശുപത്രി സൂപ്രണ്ട്‌ ഡോ. സാം പോള്‍ സി എന്നിവര്‍ സംസാരിച്ചു.
ആശുപത്രിയിലെ സേവനങ്ങള്‍ക്കായി എത്തുന്നവര്‍ ആധാര്‍ കാര്‍ഡ്‌ കൊണ്ടുവരികയും, ഒ.പി. കൗണ്ടറിന്‌ സമീപം പ്രത്യേകമായി സജ്ജീകരിച്ചിരിക്കുന്ന ഇ-ഹെല്‍ത്ത്‌ കൌണ്ടറില്‍ നിന്ന് ഇ-ഹെല്‍ത്ത്‌ കാര്‍ഡ്‌ എടുക്കേണ്ടതാണെന്നും ആശുപത്രി സൂപ്രണ്ട്‌ അറിയിച്ചു.(1) കാര്‍ഡുമായി വരുന്നവര്‍ക്ക്‌ പുതുതായി ആരംഭിക്കുന്ന സ്മാര്‍ട്ട്‌ കൌണ്ടറില്‍ നിന്നും ക്യൂ നില്‍ക്കാതെ ഒ.പി. ചീട്ട് ലഭ്യമാകും.( 2) ആശുപത്രി വെബ്‌ സൈറ്റ്‌ നവീകരിക്കുന്ന മുറയ്ക്ക്‌ കാര്‍ഡ്‌ ഉടമകള്‍ക്ക്‌ ആശുപത്രിയില്‍ വരുന്നതിനു മുമ്പ് ഓണ്‍ലൈന്‍ മുഖേന പണമടച്ച്‌ ഒ.പി. ചീട്ട് എടുക്കുവാന്‍ സാധിക്കും. (3) ഒറിജിനല്‍ ആധാര്‍ കാര്‍ഡ്‌ അല്ലെങ്കിൽ ആധാര്‍ കാര്‍ഡ്‌ നമ്പറും ആധാര്‍ ലിങ്ക്‌ ചെയ്ത ഫോണുമായി ആശുപത്രിയില്‍ വന്നാല്‍ കാര്‍ഡ്‌ ലഭിക്കുന്നതാണ്‌.( 4) ഈ കാര്‍ഡ്‌ ഇ.ഹെല്‍ത്ത്‌ സംവിധാനം ഉള്ള കേരളത്തിലെ എല്ലാ സര്‍ക്കാർ ആശുപത്രികളിലും ഉപയോഗിക്കാവുന്നതാണ്‌. (5) ആശുപത്രിയിലെ എല്ലാ കൌണ്ടറിലും ഇ-പെയ്യെന്‍റ്‌ സംവിധാനവും ഇ- ഹെല്‍ത്ത്‌ കാര്‍ഡ്‌ പ്രിന്‍റിംഗ്‌ മെഷ്യനും ഇന്ത്യന്‍ ബാങ്ക്‌ കോതമംഗലം ബ്രാഞ്ചാണ്‌ സൌജന്യമായി നല്‍കിയത്‌.
