കുട്ടമംഗലം സ്മാര്‍ട്ട് വില്ലേജ് ഓഫീസിന്റെ നിര്‍മ്മാണോദ്ഘാടനം ശനിയാഴ്ച :ആന്റണി ജോണ്‍ എംഎല്‍എ

കോതമംഗലം: കുട്ടമംഗലം സ്മാര്‍ട്ട് വില്ലേജ് ഓഫീസിന്റെ നിര്‍മ്മാണോദ്ഘാടനം ശനിയാഴ്ച രാവിലെ 10.30ന് നെല്ലിമറ്റത്ത് കവളങ്ങാട് സര്‍വ്വീസ് സഹകരണ ബാങ്ക് ഓഡിറ്റോറിയത്തില്‍ റവന്യൂ-ഭവന നിര്‍മ്മാണ വകുപ്പ് മന്ത്രി കെ രാജന്‍ നിര്‍വഹിക്കുമെന്ന് ആന്റണി ജോണ്‍ എംഎല്‍എ അറിയിച്ചു. എല്ലാ വര്‍ക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാര്‍ട്ട് എന്ന സര്‍ക്കാരിന്റെ പ്രതിജ്ഞാവാചകം നടപ്പിലാക്കുന്നതിന്റെ ഭാഗമായി സര്‍ക്കാര്‍ നടപ്പിലാക്കുന്ന സ്മാര്‍ട്ട് വില്ലേജ് ഓഫീസ് പദ്ധതിയില്‍ ഉള്‍പ്പെടുത്തി 50 ലക്ഷം രൂപ വകയിരുത്തി 1420 സ്‌ക്വയര്‍ ഫീറ്റ് വിസ്തീര്‍ണ്ണം വരുന്ന ഓഫിസ് മന്ദിരനിര്‍മ്മാണത്തിനാണ് അന്നേദിവസം തുടക്കം കുറിക്കുന്നത്.

കേരള സംസ്ഥാന രൂപീകരണത്തിന് മുമ്പ്, കുട്ടമംഗലം വില്ലേജ് കോട്ടയം ജില്ലയില്‍ മുവാറ്റുപുഴ താലൂക്കില്‍ ഉള്‍പ്പെട്ടിരുന്നു. ദേവികുളം താലൂക്കിലെ മന്നാങ്കണ്ടം, കോതമംഗലം താലൂക്കിലെ നേര്യമംഗലം, കുട്ടമ്പുഴ,പല്ലാരിമംഗലം വില്ലേജ്കളും പഴയ കുട്ടമംഗലം വില്ലേജിന്റെ ഭാഗമായിരുന്നു. 1985 ലെ സര്‍ക്കാര്‍ ഉത്തരവ് പ്രകാരം കുട്ടമംഗലം വില്ലേജിനെ വിഭജിച്ച് നേര്യമംഗലം വില്ലേജും, 2013ലെ സര്‍ക്കാര്‍ ഉത്തരവ് പ്രകാരം പല്ലാരിമംഗലം വില്ലേജും രൂപീകരിച്ചിട്ടുള്ളതുമാണ്. താലൂക്ക് ആസ്ഥാനമായ കോതമംഗലത്ത് നിന്ന് 8ൃ കിലോമീറ്റര്‍ അകലെയും ജില്ലാ ആസ്ഥാനമായ കാക്കനാട്ട് നിന്ന് 50 കിലോമീറ്റര്‍ അകലെയുമായി കോതമംഗലം നഗരത്തിനു കിഴക്ക് വശത്തായി കൊച്ചി-ധനുഷ്‌കോടി ദേശീയപാതയില്‍ നെല്ലിമറ്റം ജംക്ഷനില്‍ ബി.എസ്.എന്‍.എല്‍ ഓഫീസിന് സമീപം 1987 ല്‍ പണിപൂര്‍ത്തീകരിച്ച കെട്ടിടത്തിലാണ് വില്ലേജ് ഓഫീസ് പ്രവര്‍ത്തിച്ചുവന്നിരുന്നത്.

അനുദിനം മാറികൊണ്ടിരിക്കുന്ന പുത്തന്‍കാലത്തിനൊപ്പം മുന്നേറുകയാണ് കേരളത്തിലെ സര്‍ക്കാര്‍ ഓഫീസുകള്‍. ആധുനിക വിവര സാങ്കേതിക വിദ്യ പൊതുജനങ്ങള്‍ക്കും പ്രാപ്യമാക്കികൊണ്ട് സര്‍ക്കാര്‍ സേവനങ്ങള്‍ വേഗത്തിലും ആയാസരഹിതമായും പൊതുജനങ്ങളിലേക്ക് എത്തിക്കാനുതകുന്ന കര്‍മ്മപദ്ധതികളാണ് കേരള സര്‍ക്കാര്‍ അനുദിനം നടപ്പിലാക്കികൊണ്ടിരിക്കുന്നത്. കുട്ടമംഗലം വില്ലേജ് നാളത് വടക്ക് കീരംപാറ, നേര്യമംഗലം വില്ലേജ്, കിഴക്ക് നേര്യമംഗലം വില്ലേജ്, തെക്ക് പല്ലാരിമംഗലം വില്ലേജ്, പടിഞ്ഞാറ് കോതമംഗലം വില്ലേജ് എന്നീ വില്ലേജുകളുമായി അതിര്‍ത്തി പങ്കിടുന്നു.

കോതമംഗലം നിയമസഭാ മണ്ഡലത്തിന്റെയും ഇടുക്കി പാര്‍ലമെന്റ് മണ്ഡലത്തിന്റെയും കീഴില്‍ ഉള്‍പ്പെട്ടു വരുന്ന കുട്ടമംഗലം വില്ലേജില്‍ കവളങ്ങാട് ഗ്രാമപഞ്ചായത്തിലെ 9 വാര്‍ഡുകള്‍ പൂര്‍ണ്ണമായും 2 വാര്‍ഡുകള്‍ ഭാഗീകമായും, കീരംപാറ ഗ്രാമ പഞ്ചായത്തിലെ 4 വാര്‍ഡുകള്‍ ഭാഗീകമായും ഉള്‍പ്പെട്ടുവരുന്നതും 2011 ലെ സെന്‍സസ് വിവരങ്ങള്‍ അനുസരിച്ച് 4200-ഓളം വീടുകളിലായി ആകെ 17,400 ജനങ്ങള്‍ താമസിച്ചുവരുന്നതുമാണ്. കുട്ടമംഗലം വില്ലേജിന്റെ മൊത്തം ഭൂമിശാസ്ത്രപരമായ വിസ്തീര്‍ണ്ണം 2522.14 ഹെക്ടര്‍ ആണ്. (2023.58 ഹെക്ടര്‍ ഡ്രൈ ലാന്‍ഡ്, 498.56 ഹെക്ടര്‍ വെറ്റ് ലാന്‍ഡ്). സ്മാര്‍ട്ട് വില്ലേജ് ഓഫീസ് നിര്‍മ്മാണം സമയബന്ധിതമായി പൂര്‍ത്തീകരിക്കുമെന്നും ഉദ്ഘാടനം വേളയിലേക്ക് ഏവരെയും സ്വാഗതം ചെയ്യുന്നതായും എംഎല്‍എ പറഞ്ഞു.