കോതമംഗലം :കാനനപാതകൾ കാലികൾ കൈയ്യടക്കുന്നതു മൂലം അപകടങ്ങൾ പെരുകുന്നതായി പരാതി; ഭൂതത്താൻകെട്ട് – വടാട്ടുപാറ റോഡിലാണ് ഇത്തരത്തിൽ അപകടങ്ങൾ തുടർക്കഥയായിരിക്കുന്നത്. വനാതിർത്തികളിൽ താമസിക്കുന്നവർ വനത്തിൽ മേയാൻ വിടുന്ന കന്നുകാലികളാണ് റോഡിൽ മാർഗതടസമുണ്ടാക്കിയും അപകടങ്ങൾ വരുത്തിയും യാത്രക്കാർക്ക് ഭീഷണിയായിരിക്കുന്നത്.
വനനിയമങ്ങൾ ലംഘിച്ചാണ് വനമേഖലകളിൽ താമസിക്കുന്നവർ കന്നുകാലികളെ വനത്തിൽ മേയാൻ വിടുന്നത്. വഴിയിൽ ഗതാഗതക്കുരുക്ക് ഉണ്ടാക്കുക മാത്രമല്ല ഇവ പെട്ടെന്ന് റോഡിനു കുറുകെ ചാടുന്നതും, പരസ്പരം കുത്തു കൂടുന്നതും വാഹനയാത്രക്കാർക്ക് അപകടത്തിന് കാരണമാകുന്നുണ്ട്. നിരവധിപ്പേർക്കാണ് ഇത്തരത്തിൽ അപകടം സംഭവിച്ച് പരിക്കേൽക്കുന്നത്. ഒരാഴ്ചക്കുള്ളിൽ ഇവിടെ രണ്ട് പേർക്ക് സമാനരീതിയിൽ പരിക്ക് പറ്റിയിരുന്നു.
മുമ്പൊക്കെ കന്നുകാലികളെ മേയാൻ വേണ്ടി കാട്ടിൽ കയറ്റി വിട്ടാൽ വർഷങ്ങൾക്ക് ശേഷമാണ് ഉടമകൾ തിരികെ വീട്ടിലേക്ക് കൊണ്ടുവന്നിരുന്നത്.എന്നാൽ ഇപ്പോൾ, രാവിലെ മേയാൻ വിടുന്ന കന്നുകാലികളെ വൈകുന്നേരം സ്വമേധേയ വീട്ടിൽ തിരിച്ചെത്താൻ പരിശീലിപ്പിച്ചിരിക്കുകയാണ്. രാവിലെയും വൈകിട്ടും നൂറുകണക്കിന് കന്നുകാലികളാണ് ഇത്തരത്തിൽ റോഡ് നിറഞ്ഞ് കടന്നു പോകുന്നത്.
മേയാൻ വിടുന്ന കന്നുകാലികളെ ഉടമകൾ നിയന്ത്രിക്കാൻ തയ്യാറായില്ലെങ്കിൽ വാഹനാപകടങ്ങൾ പെരുകുമെന്നു മാത്രമല്ല, വനത്തിനുള്ളിലെ മാംസഭോജികളായ മൃഗങ്ങൾ ഇരയെത്തേടി നാട്ടിലേക്ക് ഇറങ്ങാനും സാധ്യതയുണ്ടെന്നാണ് പ്രദേശവാസികൾ പറയുന്നത്.
