വടാട്ടുപാറ: വനാതിർത്തി ഗ്രാമങ്ങളിലെ വന്യമൃഗ ശല്യം തടയാൻ നടപടി വേണമെന്ന് യുഡിഎഫ് ജില്ലാ കൺവീനർ ഷിബു തെക്കുംപുറം ആവശ്യപ്പെട്ടു. വടാട്ടുപാറ മാവിൻചുവട് തുമ്പനിരപ്പേൽ ജോസിൻ്റെ പോത്തിനെ ഇന്നലെ (ബുധൻ) പുലർച്ചെ കാട്ടാന കുത്തി കൊന്നിരുന്നു. യുഡിഎഫ് സംഘത്തോടൊപ്പം സ്ഥലത്തെത്തിയതാണ് ഷിബു തെക്കുംപുറം. വന്യമൃഗങ്ങളുടെ ശല്യം തടയുന്നതിനും നാശനഷ്ടം സംഭവിച്ചവർക്കുള്ള നഷ്ടപരിഹാരം നൽകുന്നതിലും സർക്കാർ വീഴ്ച്ച വരുത്തുകയാണ്. ഒരു വർഷം മുൻപ് മീരാൻസിറ്റി ഭാഗത്ത് താമസിക്കുന്ന ഐഷയുടെ ആടിനെ പുലി പിടിച്ചിരുന്നു. നഷ്ടപരിഹാരത്തിനായി ആ സാധു സ്ത്രീ കയറിയിറങ്ങാത്ത ഓഫിസുകളില്ല. ഇതുവരെ ഒരു രൂപ പോലും ലഭിച്ചിട്ടില്ല.
മാവിൻചുവട് പ്രദേശത്ത് താത്രി കാലത്ത് ഫോറസ്റ്റ് ഗാർഡുമാരെ നിയമിക്കണമെന്ന് തുണ്ടം റേഞ്ച് ഓഫിസർ കെ.എ.മുഹമ്മദ് റാഫിയോട് ഷിബു ആവശ്യപ്പെട്ടു. ജെയിംസ് കൊറേമ്പേൽ, എൽദോസ് ബേബി,ഇ.സി.റോയ്, ബിൻസി മോഹനൻ, കെ.എ.സിബി,ജോഷി പൊട്ടക്കൽ, രേഖ രാജു, കെ.എസ്.സനൂപ്,സാബു ജോസ്, ജോൺസൺ എന്നിവർ ഒപ്പം ഉണ്ടായിരുന്നു.
