കോതമംഗലം: കോതമംഗലം മുനിസിപ്പാലിറ്റിയേയും, വാരപ്പെട്ടി പഞ്ചായത്തിനേയും ബന്ധിപ്പിക്കുന്നതും കൊച്ചി – ധനുഷ്കോടി ദേശീയപാതയിലെ അയ്യങ്കാവിൽ നിന്നും ആരംഭിച്ച് കോഴിപ്പിളളി – പോത്താനിക്കാട് റോഡിലെ കുടമുണ്ടയിൽ എത്തി ചേരുന്നതുമായ അയ്യങ്കാവ് – ഇളങ്കാവ് – കൊഴിമറ്റം – കുടമുണ്ട ലിങ്ക് റോഡ് ആൻ്റണി ജോൺ എം എൽ എ നാടിനു സമർപ്പിച്ചു. എം എൽ എ ആസ്തി വികസന ഫണ്ടിൽ നിന്നും 12 ലക്ഷം രൂപ ചെലവഴിച്ചാണ് റോഡിൻ്റെ നിർമ്മാണ പ്രവർത്തനങ്ങൾ പൂർത്തീകരിച്ചത്. കുത്തുകുഴി- അയ്യങ്കാവ് – കോഴിപ്പിളളി മേഖലയിലെ ജനങ്ങളുടെ ഏറെ കാലമായുള്ള ആവശ്യമായിരുന്നു പ്രസ്തുത റോഡ്.
കോഴിപ്പിളളി പുഴയ്ക്കു കുറുകെയുള്ള തൊണ്ടുംപടി – മാണിത്താഴം ചെക്ക്ഡാം കം ബ്രിഡ്ജിലൂടെയാണ് ഈ റോഡ് കടന്നു പോകുന്നത്.പഞ്ചായത്ത് പ്രസിഡൻ്റ് പി കെ ചന്ദ്രശേഖരൻ നായർ അധ്യക്ഷത വഹിച്ച ചടങ്ങിൽ മുനിസിപ്പൽ ചെയർമാൻ കെ കെ ടോമി മുഖ്യാതിഥിയായി. പഞ്ചായത്ത് മെമ്പർമാരായ എയ്ഞ്ചൽ മേരി ജോബി, എം എസ് ബെന്നി,ശ്രീകല ടീച്ചർ,ദിവ്യ സലി,മുനിസിപ്പൽ കൗൺസിലർമാരായ കെ എ നൗഷാദ്,പി ആർ ഉണ്ണികൃഷ്ണൻ,ഭാനുമതി രാജു,കുത്തുകുഴി സഹകരണ ബാങ്ക് പ്രസിഡൻ്റ് കെ എം ബിജുകുമാർ,ഇ വി രാധാകൃഷ്ണൻ,ജോബി ആൻ്റണി എന്നിവർ സംസാരിച്ചു.
റോഡ് നിർമ്മാണത്തിനായി 6 സെൻ്റ് സ്ഥലത്തോളം സൗജന്യമായി വിട്ടു നൽകിയ സഹോദരങ്ങളായ പനച്ചിക്കുടി വീട്ടിൽ മാണി ആന്റണി,ജയിംസ് ആന്റണി,പയസ് ആന്റണി,ഇലഞ്ഞിക്കൽ ജെറി കുര്യയ്പ് എന്നിവരെ ചടങ്ങിൽ എം എൽ എ ആദരിച്ചു.
