കുറുപ്പംപടി : പട്ടാലിലെ പെട്രോൾ പമ്പിൽ ഇന്നലെ രാത്രി യുവാവ് കത്തി വീശി ഭീകരാന്തീക്ഷം സൃഷ്ടിച്ചതിന്റെ വീഡിയോ ദൃശ്യങ്ങളിലെ വിശദാംശങ്ങൾ പുറത്തുവരുന്നു. കാലിൽ സ്‌കൂട്ടർ കയറ്റിയത് ചോദ്യം ചെയ്തതിലെ പ്രകോപനമാണ് യുവാവ് കത്തിവീശാൻ കാരണമെന്ന് പെരുമ്പാവൂർ പൊലീസ് പറയുന്നു. പെരുമ്പാവൂർ പാറപ്പുറം ചെറുവള്ളിക്കുടി സജിത്തിന്റെ മകൻ സഞ്ജു(19)വാണ് കത്തിവീശി പമ്പിൽ ഭീകരാന്തരീക്ഷം സൃഷ്ടിച്ചത്. ബസ്സുടമ പെരുമ്പാവൂർ കാവുംപുറം കണ്ണാടൻ ജോറീസി(36)നാണ് കത്തിക്കുത്തിൽ പരിക്കേറ്റത്. കോതമംഗലം -അങ്കമാലി റൂട്ടിലോടുന്ന സെന്റ് ബേസിൽ ബസ്സിന്റെ ഉടമയാണ് ജോറീസ്. ബസ്സിൽ ഡ്രൈവറായി പോകുന്നതും ജോറീസാണ്. ബസ്സ് പാർക്കുചെയ്ത ശേഷം പമ്പിൽ നിൽക്കുകയായിരുന്ന തന്റെ കാലിൽ പെട്രോളടിക്കാനെത്തിയ സഞ്ജുവിന്റെ സ്‌കൂട്ടറിന്റെ ചക്രം കയറിയിറങ്ങിയെന്നും ഇത് ചോദ്യം ചെയ്തപ്പോൾ ഇയാൾ തന്നെ കത്തിയെടുത്ത് നേരിടുകയായിരുന്നെന്നുമാണ് ജോറീസ് പൊലീസിനോട് വെളിപ്പെടുത്തിയിട്ടുള്ളത്.
പെരുമ്പാവൂരിൽ സ്വകാര്യബസ്സ് ജീവനക്കാരനാണ് സഞ്ജു. കാലിൽ സ്‌കൂട്ടർ കയറ്റിയതിനെക്കുറിച്ച് ജോറീസ് ചോദിക്കുന്നതും തുടർന്ന് ഇരുവരും തമ്മിൽ തർക്കത്തിലേർപ്പെടുകയും സഞ്ജു കത്തിയെടുത്ത് ജോറീസിന് നേരെ പാഞ്ഞടുക്കുകയായിരുന്നു. പിന്നീട് അടിവസ്ത്രം മാത്രമിട്ട് രംഗം പ്രവേശം ചെയ്യുന്ന ജോറീസ് സഞ്ജുവിനെ ആക്രമിക്കുന്നു. സഞ്ജു മുമ്പും കത്തിക്കുത്ത് കേസ്സിൽ പ്രതിയാണെന്നും ഇയാൾ ലഹരിക്കടിമയാണെന്നുമാണ് പൊലീസ് പറയുന്നത്. ഇരുവരും പെരുമ്പാവൂരിലെ സ്വകാര്യ ആശുപത്രികളിൽ ചികത്സയിലാണ്. നിലവിൽ സഞ്ജുവിന്റെ പേരിൽ വധശ്രമത്തിനാണ് പെരുമ്പാവൂർ പൊലീസ് കേസെടുത്തിട്ടുള്ളത്.
📲 വാർത്തകൾ മൊബൈൽ ലഭിക്കുവാൻ ജോയിൻ ചെയ്യുക.. 👇
