കോതമംഗലം: തെക്കുമ്മേല് കുടിവെള്ള പദ്ധതിയുടെ സംരക്ഷണഭിത്തിയും പമ്പ് ഹൗസിന്റെ അടിഭാഗവും തകര്ന്നുവീണതോടെ ഉദ്ഘാടനം കഴിഞ്ഞ് എട്ട്മാസം പിന്നിട്ട പദ്ധതിയുടെ പമ്പിംഗ് നിലച്ചു. നിര്മാണം ആരംഭിച്ച് ഒന്പത് വര്ഷം പിന്നിട്ടശേഷം കഴിഞ്ഞ മേയ്മാസത്തിലാണ് തെക്കുമ്മേല് കുടിവെള്ള പദ്ധതിയുടം ഉദ്ഘാടനം നടത്തിയത്. അന്പത് ലക്ഷത്തിലധികം രൂപയാണ് പലഘട്ടങ്ങളിലായി ചെലവഴിച്ചത്.
കീരമ്പാറ പഞ്ചായത്തിലെ ഒന്നാം വാര്ഡിലുള്ള അന്പതോളം വീട്ടുകാര്ക്ക് കുടിവെള്ളം ലഭ്യമാക്കുന്നത് ഇവിടെ നിന്നാണ്. പെരിയാര്വാലി ക്യാച്ച്മെന്റ് ഏരിയയോട് ചേര്ന്നുള്ള കിണറിന്റെ ഒരു വശത്തുള്ള സംരക്ഷണഭിത്തിയാണ് തകര്ന്നുവീണത്. പമ്പ് ഹൗസിന്റെ അടിഭാഗവും തകര്ന്നുവീണിട്ടുണ്ട്.
കിണര് ശുചീകരണം നടക്കുന്നതിനിടെയാണ് കരിങ്കല്കെട്ട് തകര്ന്നുവീണത്. പണിയെടുത്തുകൊണ്ടിരുന്നവര് തലനാരിഴക്കാണ് രക്ഷപെട്ടതെന്ന് ജനകീയ സമിതി ഭാരവാഹി പറഞ്ഞു. സംരക്ഷണഭിത്തി തകരുകയും പമ്പ് ഹൗസ് അപകടത്തിലാകുകയും ചെയ്തതോടെ പമ്പിംഗ് നിര്ത്തിവച്ചിരിക്കുകയാണ്. ഇതുമൂലം ഗുണഭോക്താക്കള് കടുത്ത ദുരിതത്തിലായി.
പമ്പ് ഹൗസ് താല്ക്കാലികമായി മാറ്റി സ്ഥാപിച്ച് പമ്പിംഗ് ആരംഭിക്കാനുള്ള സാധ്യതയാണ് അധികാരികളുടെ പരിഗണനയിലുള്ളത്. ഫണ്ട് ലഭ്യമാകുന്നതിനനുസരിച്ചു മാത്രമെ സംരക്ഷണഭിത്തി നിര്മിക്കാനാകു. അതിന് കാലതാമസമുണ്ടാകും. കുടിവെള്ള വിതരണം പുനരാരംഭിക്കാനുള്ള നടപടിയാണ് ഉടനടി വേണ്ടതെന്ന് പഞ്ചായത്ത് അംഗം ശ്രീജ ബിജു പറഞ്ഞു.
നിര്മാണത്തിലെ അപാകതയാണ് സംരക്ഷണഭിത്തിയുടെ തകര്ച്ചക്ക് കാരണമെന്ന് ആരോപണമുണ്ട്. ഉറപ്പില്ലാത്ത മണ്ണില്നിന്നുമാണ് കരിങ്കല്ഭിത്തി കെട്ടിപ്പൊക്കിയത്. ഇത് ഉദ്യോഗസ്ഥരുടെ വീഴ്ചയാണ്. ഇതസംബന്ധിച്ച് വിജിലന്സ് അന്വേക്ഷണവും നടപടിയും വേണമെന്ന് ആവശ്യമുയര്ന്നിട്ടുണ്ട്.
